Според најновото видео објавено на официјалниот YouTube канал на Windows, врвните Copilot+ компјутери наводно постигнуваат до 58% подобри резултати од MacBook Air компјутерите со M3 чип.
Microsoft вобјави нова промотивна кампања со која ги истакнува перформансите на своите Copilot+ компјутери во споредба со конкурентските модели на Apple. Видеото со траење од 12 секунди е фокусирано на резултатите од Cinebench 2024 тестовите за повеќејадрени перформанси спроведени претходно оваа година. Microsoft посебно потенцира дека модели како Lenovo Yoga Slim 7x, Surface Laptop и HP OmniBook Ultra 14 значително го надминуваат минатогодишниот MacBook Air со M3 архитектура.
Интересно е што Microsoft во својата кампања ја споменува и споредбата со поновите модели на MacBook Air базирани на M4 чипот, но во тој случај предноста на Copilot+ уредите се намалува на скромни 13%. Овој факт не е истакнат во главниот дел од кампањата.
„Нашите Copilot+ компјутери се најмоќните Windows уреди што некогаш сме ги создале, со перформанси кои за 58% го надминуваат MacBook Air M3 во повеќејадрени задачи,“ изјави претставник на Microsoft.
Мал удел на пазарот
И покрај бројките, реалноста покажува дека Copilot+ компјутерите со Qualcomm Snapdragon X Elite чипови во моментов сочинуваат помалку од 10% од вкупните испораки на лаптопи во третиот квартал од годинава. Apple на почетокот на 2025 година го претстави M4 MacBook Air кој носи значително подобрување во перформансите и енергетската ефикасност. Новиот модел стандардно доаѓа со 16 GB меморија по пониска цена од својот претходник, што дополнително ја комплицира маркетинг-пораката на Microsoft.
Иако Copilot+ уредите доминираат во тестовите за повеќејадрени перформанси, M4 MacBook Air сè уште има предност во еднојадрените задачи, кои често се клучни за секојдневна употреба. Дополнително, традиционално се смета дека Apple нуди подобро интегрирано хардверско и софтверско искуство и подолг век на траење на батеријата.
Што велат социјалните мрежи?
На социјалните мрежи брзо се појавија критики на сметка на кампањата на Microsoft. Рекламата предизвика различни реакции на платформата X, каде што корисници ја коментираат стратегијата на Microsoft за споредба со минатогодишниот модел на Apple.
Некои, како корисникот @ItsRichieT, се потсмеваат на продукциската вредност, нарекувајќи ја „комично евтина“, додека други, како @rozetked, потенцираат дека тврдењето на Microsoft не го споменува поновиот M4 MacBook Air, кој излезе претходно оваа година со подобри перформанси и енергетска ефикасност. Корисникот @aaronp613 коментира дека Apple-овиот M4 MacBook Air нуди подобра вредност со 16 GB меморија по пониска цена. Дополнително, корисници на форуми како MacRumors истакнуваат дека Microsoft ги споредува своите врвни уреди со основниот модел на Apple, што го сметаат за пристрасен пристап.
