Веројатно ви е познато дека, доколку сакате да избегнете дехидратација, мора да пиете вода пред да почувствувате жед, но тоа е прилично тешко да се знае доколку не користите некој уред за носење, што ќе ве потсети на тоа.
Но, таков уред мора да се купи посебно ако сакате да се заштитите од дехидратација, па професорот Тарек Ал-Нафури и неговите колеги од Универзитетот за наука и технологија крал Абдула (KAUST) во Саудиска Арабија ја проучувале употребата на капацитивни сензори кои веќе се вградени во допирните екрани на паметните телефони што веќе ги имаме.
За да го демонстрираат концептот, истражувачите користеле ист тип капацитивен сензор каков што се наоѓа во екраните на паметните телефони, а кој е способен да детектира суптилни промени во влажноста на кожата. Кога врвот од прстот ќе го допре сензорот, тој регистрира промени во капацитетот на кожата, односно мери колку добро кожата складира електричен полнеж, што варира во зависност од нивото на хидратација.
Истражувачите сугерираат дека овие податоци со тек на време би можеле да им овозможат на луѓето да ја следат хидратацијата во реално време, без игли, носливи уреди или лабораториски анализи. Брз допир би можел да го потсети некого дека треба да пие вода или да надомести течности пред да се појават симптоми како што се вртоглавица или замор.
„Замислуваме секојдневно следење на хидратацијата во реално време, каде што корисниците едноставно ќе го стават прстот на екранот од својот паметен телефон за да го проценат статусот на хидратација“, вели авторката на студијата Сумија Сијуцеф, поранешна студентка во истражувачката група на Ал-Нафури.
За да ја валидираат својата технологија, тимот од KAUST собра повеќе од 4000 отчитувања од врвови на прсти на луѓе кои или го почитувале Рамазан и постеле поголем дел од денот, или биле спортисти што играле ултимејт фризби или вежбале во теретана. Тие обучиле модели на машинско учење да ги претворат малите промени во спроводливоста на кожата во мерка за содржина на вода во телото.
Кога системот бил тестиран, покажал импресивни резултати — точно ги разликувал хидрираното и дехидрираното состојба во 92 проценти од времето кај спортистите и 87 проценти кај луѓето што постат.
Истражувањето е опишано во труд објавен во списанието IEEE Sensors Journal и може да го пронајдете на овој линк.
