Компанијата Мета ги објави Aria Gen 2 – експериментални XR очила со следење на поглед, здравствени сензори и AI функции, кои го покажуваат правецот во кој се движи иднината на носливата технологија и просторната компјутерија
Мета, матичната компанија на Фејсбук, ја претстави Aria Gen 2, втората генерација на нејзините експериментални паметни очила кои се дел од пошироката стратегија за освојување на пазарот на проширена реалност (AR) и нослива технологија. Иако уредот сè уште е наменет исклучиво за внатрешна употреба и истражување, неговите можности јасно ја најавуваат иднината на носливите уреди поттикнати од вештачка интелигенција и на просторната компјутерија.
Повеќе од прототип: Aria Gen 2 носи револуција во интеракцијата
За разлика од првата генерација, Aria Gen 2 носи значителни хардверски подобрувања. Најголемата новина е комплетен систем за следење на очите, кој го мери правецот на поглед на секое око, трепкањата, дијаметарот на зеницата и положбата на рожницата. Ваквите податоци овозможуваат многу понапредна интеракција помеѓу корисникот и дигиталните средини – било за креирање на AR интерфејси, било за тренирање на AI модели.
Покрај тоа, уредот е опремен со компјутерски вид кој ги следи рацете и објектите во просторот со таква прецизност што може да се користи и за обука на роботски раце. Оваа функционалност ја нагласува амбицијата на компанијата да влезе и во областа на роботиката.
Практичност и удобност
Во споредба со првиот модел, Aria Gen 2 е значително полесен и поергономичен. Рамката сега може да се преклопи, а очилата се достапни во дури осум големини за да одговараат на различни облици на глава и лице.
Уредот сега вклучува и здравствени сензори, како PPG сензор за мерење на отчукувањата на срцето вграден во носниот дел, како и контакт микрофон што го подобрува приемот на глас во бучни средини.
Тука се и други елементи: 12 MP RGB камера, седум просторни микрофони, сензор за амбиентална светлина, акцелерометар, жироскоп, стерео звучници и USB-C приклучок.
Meta vs Apple: Трката во AR светот
Додека Meta ги развива и јавно демонстрира своите технологии, Apple наводно се подготвува за својата AR револуција во тајност. Тим Кук го турка развојот на AR производ кој би можел да биде претставен во следната година. Сепак, без конкретен производ на повидок, Meta засега води во оваа трка.
Иако Aria Gen 2 сè уште не е подготвена за комерцијална продажба, нејзината технологија јасно го покажува правецот во кој Meta ја гледа иднината — носливи уреди кои беспрекорно го спојуваат физичкото и дигиталното искуство. Дали вакви очила ќе ги носиме секојдневно за пет или десет години – прашање е само на време, пренесува Tech Times.
