На WWDC 2025 конференцијата, Apple го претстави Liquid Glass – радикална промена во дизајнот. Овој нов визуелен стил, инспириран од интерфејсот на Vision Pro, е јасен показател за насоката во која се движат идните AR очила.
На неодамнешната конференција WWDC 2025, Apple ја најави својата најдраматична промена во софтверскиот дизајн во последните десет години: Liquid Glass. Овој визуелен редизајн ни дава увид во тоа што можеби нè очекува со долгонајавуваните AR очила од Apple, чие деби, според гласините, се очекува следната година.
Корисниците и аналитичарите, како што пренесува и TechCrunch, го поврзуваат Liquid Glass со потенцијалните AR очила, бидејќи новиот дизајн црпи силна инспирација од корисничкиот интерфејс на Apple Vision Pro. Името „Liquid Glass“ (Течно стакло) доаѓа од идејата дека секој прозорец на екранот изгледа како стаклена плоча – проѕирна и донекаде рефлектирачка. Тоа му дава на интерфејсот поелегантен и пофлуиден изглед, иако во моменталната бета верзија за развивачи Apple сè уште работи на усовршување на транспарентноста на елементите.
Vision Pro не постигна значаен комерцијален успех – цената од 3.500 долари и фактот дека, за разлика од компјутер, не ја докажа својата неопходност во секојдневниот живот, си го направија своето. Сепак, UX дизајнот на Vision Pro е импресивен, бидејќи носењето на хедсетот го прави многу помалку дезориентирачко искуство. Долготрајното нурнување во виртуелната реалност може да делува неприродно, па Apple ги искористи своите способности за мешана реалност за да ги наслаи прозорците од апликациите врз вистинското опкружување на корисникот, наместо да ги постави врз синтетичка позадина.
Apple можеби нема да успее да ги убеди луѓето дека им треба хедсет од 3.500 долари, но за да остане во чекор со конкуренти како што се Ray-Ban очилата од Meta и обновениот обид на Google со паметни очила, мора да влезе во арената на полесен хардвер. Една од најголемите предности на Apple како компанија – нешто што ја издвојува од Meta и Google – е нејзината репутација за елегантен и модерен дизајн.
Според извештаите на Марк Гурман од Bloomberg, овие очила ќе имаат камери, микрофони и звучници, слично на конкуренцијата. Siri – која и самата сè уште чека редизајн – ќе биде вградена и ќе помага при телефонски повици, пуштање музика, превод во живо и навигација. Корисниците ќе можат да гледаат известувања, слики и други елементи од проширената реалност на екранот. Доколку тоа се оствари, Apple ќе мора совршено да го совлада стилот на овие транспарентни дизајнерски елементи. Кога носите AR очила и добиете некое известување, најверојатно сакате тоа да се слее со вашето опкружување, а не одеднаш да ви се појави огромна шарена кутија што ќе ви го попречи видот додека се движите.
Иако сè уште не знаеме многу за AR очилата на Apple, опкружени со гласини и шпекулации, убедени сме дека токму Liquid Glass ќе биде клучен дел од нивниот интерфејс.
