Новата функција на Google пребарувањето користи Gemini AI за да креира аудио резимеа во форма на дијалог меѓу два виртуелни водители
Google пребарувањето доби нова димензија – Audio Overviews, функција што користи вештачка интелигенција за да ви ги сумира резултатите од пребарувањето во форма на кратко аудио, слично на мини подкаст со два водители. Наместо да скролате низ низа линкови, сега можете само да слушате како AI разговара за темата што ве интересира.
Како функционира?
Функцијата ги користи моделите на Google Gemini за да ги обработи најрелевантните резултати од првата страна на пребарувањето и креира разговор меѓу две виртуелни личности кои заеднички ја анализираат темата. На пример, наместо да читате десет статии за потеклото и значењето на некој празник, можете да слушнете пријателски дијалог во кој AI гласовите објаснуваат историја, контекст и интересни факти.
Функцијата не е наменета за кратки и директни пребарувања како „кога е Денот на државноста?“, но за подлабоки теми е совршена. Дополнително, можете да ја прилагодите брзината на слушање (од 0.25x до 2x) и да ги видите изворите што ги користел AI при составувањето на содржината, во случај да сакате подетално да истражите.
Audio Overviews моментално се достапни преку Google Labs, експерименталната платформа за тестирање нови опции. За да ги користите:
-
Посетете го Google Labs (labs.google.com)
-
Пријавете се за тестирање на функцијата Audio Overviews
-
По активирањето, пребарувањата што ја поддржуваат оваа опција ќе прикажат мал аудио плеер со копче „слушај резиме“
Повеќе од обично резиме
Оваа функција не е сосема нова – првично беше дел од алатката NotebookLM, каде што служеше како помош при обработка на белешки. Но, сега е дополнително унапредена – корисниците на NotebookLM можат да поставуваат дополнителни прашања во реално време и да ја користат функцијата „Deep Dive“ за фокусирање на специфични делови од темата.
Иднината на пребарувањето е разговорна и звучна
Со ова, Google јасно покажува дека ја гледа иднината на интернет пребарувањето како интерактивна и звучна, а не само текстуална. Во свет каде што сè почесто ги консумираме информациите додека сме во движење – било да шетаме куче, готвиме или возиме – Audio Overviews би можеле да станат стандард за пасивна, но информативна консумација на содржини.
Засега, опцијата е достапна само за оние што ќе се пријават, но не би било изненадување доколку многу брзо стане дел од основното Google искуство.
