Panasonic Z95B OLED од 2025 година автоматски се вклучува и исклучува заедно со вашиот компјутер благодарение на унапредениот CEC протокол — идеално решение за оние што користат ТВ како монитор.
Panasonic повторно докажува дека е еден од најиновативните производители кога станува збор за телевизори. По минатогодишните подобрувања во квалитетот на звукот, овојпат компанијата го редефинира начинот на кој телевизорот комуницира со компјутерите.
Меѓу моделите за 2025 година, особено се издвојува Panasonic Z95B OLED, кој користи унапреден CEC (Consumer Electronics Control) протокол за телевизорот автоматски да се вклучи кога ќе го вклучите лаптопот и да се исклучи кога ќе го исклучите.
Кај повеќето монитори, екранот само се затемнува кога нема сигнал, но не се исклучува целосно. Иако и порано постоеше можност да се постигне слична функционалност со користење ТВ како монитор, поставките беа сложени и често бараа дополнителни CEC адаптери или софтверски трикови од GitHub. Panasonic сега пронајде двонасочно решение што користи обични кабли, без дополнителна опрема.
Нова ера на CEC функционалност за компјутери
Многу корисници секојдневно користат CEC, а да не се ни свесни за тоа — на пример, кога ќе ја вклучите гејминг конзолата, па автоматски се вклучува и телевизорот, или кога ја контролирате јачината на звукот преку далечинскиот управувач на стриминг уредот. Но, кај компјутерите оваа опција досега беше ограничена, а ретко кој се впушташе во комплицирано конфигурирање.
Иако користењето телевизор како монитор сè уште не е масовно распространето, новата имплементација на CEC протоколот од Panasonic значително го олеснува користењето ТВ и компјутер заедно, без технички пречки.
Ако досега не сте размислувале да користите телевизор како монитор за компјутер, сега имате повеќе причини од кога било. Модерните телевизори нудат високи фреквенции на освежување: LG G5 OLED и Samsung S95F OLED достигнуваат дури 165 Hz — вистинска новина за телевизори. Hisense, исто така, додаде 165 Hz освежување речиси во целата понуда за 2025 година, а некои модели доаѓаат и со USB-C приклучоци за напојување и пренос на видео
