Новиот модел би можел да биде наследник на Honor Power, а батеријата веќе го доби 3C сертификатот во Кина.
Откако во април го изненади пазарот со моделот Honor Power со огромна батерија од 8000mAh, изгледа дека Honor подготвува уште поамбициозен уред. Според информации од кинеската мрежа Weibo, кои ги сподели познатиот типстер Digital Chat Station, компанијата работи на телефон кој ќе има батерија со капацитет од дури 8200mAh. Оваа батерија веќе го поминала 3C сертификатот во Кина, што укажува дека развојот е во напредна фаза.
Во базата на 3C се појавиле две варијанти на батеријата со ознака HB5668A0EIW, двете со номинален капацитет од 8100mAh. Едната верзија ја произведува компанијата Sunwoda Electronics, додека другата ја изработува самиот Honor. Станува збор за литиум-полимерна батерија со номинален напон од 3.77V и максимален напон при полнење од 4.53V, со вкупна енергетска вредност од 30.54Wh.
Сè уште не е познато дали овој нов модел ќе биде дел од постоечката серија Honor Power или ќе се претстави како целосно нова линија. Со оглед на тоа што претходниот Power модел веќе имаше слични карактеристики, можно е да станува збор за директен наследник.
Magic V5 и средната класа
Во истата објава, Digital Chat Station наведува дека Honor Magic V5 ќе има најголема батерија досега во еден преклопен телефон – дури 6100mAh во куќиште со дебелина од само 8.8 mm. Паралелно со тоа, Honor наводно развива и уред од средната класа со батерија од 8200mAh, што може да го направи уред со убедливо најдобра автономија и најдолго траење на батеријата во таа класа.
Потсетување на Honor Power
Honor Power доаѓа со 6.78-инчен OLED екран со резолуција од 1.5K и освежување од 120Hz, Snapdragon 7 Gen 3 чипсет, батерија од 8000mAh со поддршка за 66W брзо полнење и MagicOS 9 оперативен систем базиран на Android 15. Системот на камери го сочинуваат 50 MP главна и 5 MP помошна камера, додека напред има сензор од 16 MP.
Honor очигледно продолжува да експериментира со големи батерии, таргетирајќи корисници кои придаваат приоритет на автономијата на уредот. Иако сè уште не е познато кога новиот модел ќе биде претставен, интересот на љубителите на телефони со долготрајна батерија дефинитивно расте со секој изминат ден, пишува Gizmochina.
