Новата функција во Android 16 открива лажни базни станици, но повеќето постоечки телефони сè уште немаат хардвер што го поддржува тоа.
Google воведува нова безбедносна функција во Android 16 која може да препознае сомнителни мобилни мрежи и да го предупреди корисникот доколку е во опасност од прислушување или следење преку таканаречени „стингреј“ уреди.
Stingray, познат и како IMSI-catcher, е уред што се однесува како лажна базна станица. Тој ги мами мобилните телефони да се поврзат со него наместо со вистинската мрежа, што му овозможува на напаѓачот да дојде до локацијата на корисникот, идентитетот на уредот, па дури и до содржината на пораките и повиците. Најчесто, корисникот не знае дека неговата приватност е загрозена.
Во обид да стави крај на ваквото шпионирање, Android 16 воведува нова функција наречена „Безбедност на мобилната мрежа“ (Mobile network security), која ќе може да детектира невообичаена активност поврзана со мрежното поврзување. На пример, ќе го предупреди корисникот ако телефонот се поврзе на мрежа што не е енкриптирана или ако мрежата се обиде да го прочита неговиот единствен идентификатор — што се типични методи на стингреј уредите.
Друга важна новина е можноста корисникот целосно да ја исклучи поддршката за 2G мрежи, кои и понатаму се лесна мета за напади поради недостаток на современа заштита и енкрипција.
Сепак, оваа функционалност нема да биде достапна на постоечките Android телефони. Причината е што моменталниот хардвер едноставно не е опремен за ваков вид заштита. Првиот уред за кој се очекува да ја поддржува новата функција е претстојниот Google Pixel 10.
Ова не е првпат Google да се обиде да го спречи стингреј надзорот. Уште во Android 15 беа воведени заштити кои ги блокираа обидите на мрежите да ги читаат идентификаторите на телефоните или да ја онеспособат енкрипцијата на повиците. Сега, со Android 16, безбедносните мерки се дополнително зајакнати.
Иако стингреј уредите првично биле користени од државни служби, нивната употреба се проширила и кај приватни актери — од хакери до корпоративни шпиони, што ги прави сериозна и реална закана.
Благодарение на новите мерки на Google, корисниците наскоро ќе имаат поголема контрола и увид во тоа како нивните телефони се поврзуваат со мобилните мрежи, а со тоа и подобра заштита од невидливи напади од сенка, пренесува Android Central.
