Шест проекти во Франција, Германија, Шведска и Полска добиваат средства од Иновацискиот фонд за зајакнување на европската индустрија за батерии и намалување на зависноста од увоз
Европската комисија најави доделување на неповратни средства во износ од 852 милиони евра за шест пионерски проекти насочени кон производство на батериски ќелии за електрични возила. Финансирањето доаѓа од Иновацискиот фонд, кој се полни со приходи од системот на ЕУ за тргување со емисии (ETS), и претставува конкретен чекор во реализација на целите за декарбонизација и зајакнување на индустриската конкурентност на Унијата. Средствата се доделени по првиот целен повик за проекти од секторот за батерии, објавен во декември 2024 година.
Чиста автомобилска индустрија
Овие проекти се клучни за остварување на целите на европскиот индустриски акциски план за автомобилскиот сектор и планот за „чиста“ индустрија. Со нивната реализација се поттикнува воведување на иновативни и одржливи производствени техники, се намалува зависноста на Европа од увоз на стратешки компоненти и се отвораат висококвалитетни работни места. Инвестициите се насочени кон изградба на отпорна индустриска основа и зајакнување на водечката позиција на Европа во развојот и примена на чисти технологии.
За финансирање се одбрани шест стратешки проекти ширум Европа. Во Франција тоа се проектите ACCEPT на компанијата Automotive Cells Company и AGATHE на Verkor. Германија е претставена со проектите CF3_at_Scaleна групата Cellforce и WGF2G на Leclanche. Во Шведска е одбран проектот NOVO One на компанијата NOVO Energy, додека во Полска ќе се развива проектот 46inEU на LG Energy Solution.
Се очекува сите наведени проекти да започнат со работа пред 2030 година, а по нивното завршување ќе имаат комбиниран годишен производствен капацитет од околу 56 GWh батериски ќелии. Според проценките, во првите десет години од работа, овие проекти ќе ги намалат емисиите на стакленички гасови за приближно 91 милион тони еквивалент на CO₂.
На повикот за поднесување на предлози се пријавиле 14 проекти од осум земји, од кои 13 ги исполниле критериумите за прифатливост. Потпишувањето на договорите за доделување неповратни средства со Европската извршна агенција за клима, инфраструктура и животна средина (CINEA) се очекува во третото тримесечје од 2025 година. Оваа иницијатива е дел од поширокиот план за зајакнување на европскиот синџир на вредности за батерии, за кој е предвидена финансиска поддршка до 3 милијарди евра.
