Што сè планира Apple да лансира во втората половина од годината? Нови модели на iPhone 17, M5 Mac компјутери и изненадувања за паметниот дом
Apple се подготвува за возбудлива есен. Иако летните месеци традиционално се помирни за технолошкиот гигант од Купертино, бројни извештаи и гласини укажуваат дека втората половина од 2025 ќе биде исклучително богата со премиери. Во продолжение, ви ги пренесуваме сите досегашни информации за повеќе од 15 нови уреди од Apple што треба да пристигнат до крајот на годината.
Нови iPhone 17 – четири модели, повеќе иновации
Apple традиционално ја претставува новата генерација iPhone уреди во септември, а за 2025 година се очекуваат четири модели:
- iPhone 17 го задржува препознатливиот дизајн и A18 чипот од iPhone 16, но доаѓа со поголем екран од 6,3 инчи и унапредена предна камера од 24 MP. Можно е да поддржува и стапка на освежување од 120Hz.
- iPhone 17 Air е целосно нова верзија со ултра-тенко и лесно куќиште. Има 6,6-инчен екран, A19 чип, 12 GB RAM, задна камера од 48 MP и предна од 24 MP. Има еден звучник и опционална футрола со дополнителна батерија.
- iPhone 17 Pro добива редизајниран модул со три камери, секоја од 48 MP, алуминиумска рамка, A19 Pro чип, 12 GB RAM и можен систем за ладење со парна комора.
- iPhone 17 Pro Max ги задржува сите карактеристики на Pro моделот, но има нешто подебело куќиште кое овозможува поголема и подолготрајна батерија.
Watch Ultra 3, Series 11 и SE 3
- Apple Watch Ultra 3 добива поддршка за 5G и сателитска комуникација, што овозможува испраќање пораки и без Wi-Fi мрежа. Се очекуваат и новиот S10 чип, побрзо полнење и OLED екран со подобра видливост под агли.
- Apple Watch Series 11 претставува освежување со S11 чип и мали измени, по големите промени во Series 10.
- Apple Watch SE 3 би можел да добие нови функции и подобри перформанси, иако се откажано од пластично куќиште во живописни бои. Ова ќе биде првото освежување од 2022 година.
M5 чипот доаѓа на Mac и iPad уредите
Apple планира да ја воведе новата генерација на M5 чипови во следните уреди:
- iPad Pro
- Vision Pro
- iMac
- Mac mini (со M5 и M5 Pro чипови)
- MacBook Pro (во верзии M5, M5 Pro и M5 Max)
Иако не се очекуваат големи промени во дизајнот, новите M5 чипови ветуваат подобри перформанси и енергетска ефикасност.
Други Apple уреди што се очекуваат
- Apple TV 4K (4. генерација): Нов Wi-Fi/Bluetooth чип со поддршка за Wi-Fi 6E или Wi-Fi 7 и побрз чипсет од актуелниот A15 Bionic. Можно е и вградување FaceTime камера.
- HomePod mini (2. генерација): Нов безжичен чип и подобрен квалитет на звукот.
- AirTag (2. генерација): Три пати поголем дострел и побезбеден звучник за заштита од злоупотреба при следење.
AirPods, Studio Display и Home Hub
- AirPods Pro 3: Нов дизајн и подобрена активна редукција на бучава. Гласините укажуваат на можно пристигнување во 2025 или дури во 2026 година.
- Studio Display 2: Се очекува на крајот од 2025 или почетокот на 2026, со mini-LED осветлување.
- Apple Home Hub: Нов паметен домашен уред кој може да ги комбинира функционалностите на HomePod и iPad – контрола на паметниот дом, FaceTime повици и персонализирана Siri.
Apple подготвува вистински огномет од нови производи до крајот на 2025 година – од целосно нови модели на iPhone и паметни часовници, до напредни Mac компјутери со M5 чипови и уреди за паметниот дом. Септември и октомври ќе бидат клучни месеци за претставување на најголемиот дел од новитетите, а сите со нетрпение ја очекуваме есента. Не само затоа што сакаме да заврши жештината.
