Повеќе од 20 нови производи за паметен дом, приспособени за работа со Matter, ќе бидат дел од понудата на оваа продавница, а системот IKEA Home smart ќе се отвори и за производи од други брендови.
Во јануари 2026 година, Икеа воведува повеќе од 20 нови производи за паметен дом, приспособени за работа со Matter – универзалниот стандард за паметни домови. Ова е најголемиот чекор што Икеа досега го направила за да ја направи паметната технологија поотворена, поедноставна и подостапна за што поголем број луѓе.
По години истражување и учење како паметните производи можат да го подобрат секојдневието, Икеа ја претставува својата досега најотворена и наједноставна линија производи, дизајнирани според реалните потреби, секојдневните рутини и променливите навики во домот. Целта не е додавање технологија поради самата технологија, туку создавање производи што се прилагодуваат на луѓето и нивните секојдневни предизвици.
Matter овозможува уредите од различни брендови да соработуваат без пречки, нудејќи поголема флексибилност меѓу платформите и екосистемите. За поврзување на производите што го поддржуваат Matter во паметен дом, потребен е компатибилен хаб, како што е DIRIGERA.
„Паметната технологија за домаќинства досега не беше доволно едноставна за користење, ниту доволно поволна за да ја разгледаат повеќето луѓе. Воведувањето на Matter во нашите производи е голем чекор напред со кој овозможуваме компатибилност меѓу различни брендови. Нашата цел е да го направиме паметниот дом едноставен за користење, разбирлив и достапен за сите“, истакна Давид Гранац, менаџер на асортиман во IKEA of Sweden.
Новите производи се дизајнирани да понудат висококвалитетни и добро интегрирани решенија за паметна технологија по пристапни цени и да функционираат во кој било систем за паметен дом што го претпочита корисникот. Со поддршката за Matter, IKEA Home smart системот се отвора и за производи од други брендови.
Важен чекор во таа насока е тоа што DIRIGERA, паметниот хаб на IKEA, сега е и Matter контролер. Тој може да управува со уреди од други брендови што го поддржуваат Matter, а како Matter Bridge обезбедува и постојните IKEA паметни производи да бидат компатибилни со платформите што го користат Matter стандардот. Така, IKEA Home smart станува уште поотворен и пофлексибилен систем.
Нов правец на звукот во домот
Додека новите паметни производи пристигнуваат во јануари, Икеа истовремено го најавува и новиот чекор во сегментот на звукот, со желба звучниците да добијат иста важност и личност како и остатокот од домот. Електрониката често се доживува како исклучиво функционална и нешто што треба да се скрие, па затоа тешко се вклопува во ентериерот. Икеа сака да го промени тоа.
Два нови Bluetooth звучници и нова дизајнерска соработка, кои ќе бидат лансирани подоцна оваа година, ја рефлектираат амбицијата звукот да стане повидлив и попријатен дел од секојдневието, преку производи што звучат одлично и кои луѓето со гордост ги покажуваат.
Во јули ќе биде лансиран NATTBAD Bluetooth звучникот во жолта, розова и црна боја, со дизајн што потсетува на старо радио и што нуди забавно и поволно воведување во звукот во домот. Во октомври доаѓа BLOMPRAKT, звучник со интегрирано светло кој нуди практично двојно решение за маса со одличен звук. Bluetooth звучниците се дизајнирани за лесна употреба – подготвени за користење веднаш по вадењето од кутија, со функции како едноставно поврзување на повеќе звучници и Spotify Tap опција, без потреба од техничко знаење.
Новите производи ставаат акцент на пристапноста и едноставноста. Икеа ги користи стекнатите знаења од развојот на звукот за да создаде производи што лесно се вклопуваат во домот, без нивната цена да биде пречка.
„Научивме многу за создавање висококвалитетни звучни искуства што се едноставни за употреба. Разбираме како луѓето сакаат да го наместат звукот во домот за да создаде атмосфера и да делува природно. Овие сознанија и понатаму нѐ водат додека сè повеќе го поврзуваме светот на уредување на домот и звукот. Нашата цел е звукот во домот да го направиме достапен, функционален и пријатен, без дополнителна сложеност. Тоа нѐ издвојува и на тоа ќе го градиме следното поглавје за тоа што може да биде звукот во домот“, заклучува Давид Гранац.
Во јануари пристигнува и дизајнерска соработка со шведската дизајнерка Текла Северин, позната под името „Teklan“. Позната по изразеното користење на бои, соработката истражува како електрониката може да стане поприроден дел од домот – комбинирајќи технологија со личен стил.
Дополнителни информации за паметниот асортиман и идните соработки ќе бидат објавени до јануари.
