ByteDance, матичната компанија на TikTok, која веќе е позната по своите Pico VR очила, работи на развој на лесни очила за мешана реалност кои ќе бидат директна конкуренција на претстојните производи на Meta.
Според порталот Engadget, ByteDance – технолошкиот гигант зад мега-популарната апликација TikTok – наводно развива сопствени очила за мешана реалност кои ќе конкурираат на уредите на Meta.
Развојот на уредот му е доверен на стартапот за виртуелна реалност на ByteDance – компанијата Pico, која е веќе позната по својот VR уред Pico 4.
Наместо гломазен уред што се носи на глава, целта е да се создаде мал и лесен уред, приближно со големина на Bigscreen Beyond, кој тежи само 127 грама. За да постигне толку мала тежина, Pico планира поголемиот дел од компјутерската обработка да го префрли на надворешна единица (таканаречен „puck“) која ќе биде поврзана со очилата преку кабел. Сличен пристап веќе користеше и Meta со својот прототип на AR очила наречен Orion.
Покрај тоа, се наведува дека Pico работи и на развој на специјализирани чипови за уредот, кои ќе ги обработуваат податоците од сензорите со цел да се минимизира латенцијата.
Иако многу детали сè уште не се познати, наводно очилата на ByteDance ќе бидат многу слични на претстојниот уред за мешана реалност кој го развива Meta. По лансирањето на Quest 3S, Meta го одложи развојот на Quest 4 токму за да се фокусира на создавање на лесни MR очила.
Засега не е познато кога официјално ќе бидат претставени очилата на ByteDance, ниту на кои пазари ќе бидат достапни.
