Нова технологија развиена од кинески научници користи индустриски отпад и јаглерод диоксид (CO₂) за добивање сахароза, скроб и други шеќери.
Кинеските научници постигнаа голем пробив развивајќи метод со кој метанолот, добиен од јаглерод диоксид, се претвора во бел шеќер без потреба од садење шеќерна трска или шеќерна репка. Користејќи систем за in vitro биотрансформација (ivBT), тимот од Институтот за индустриска биотехнологија во Тјанџин успеа да синтетизира сахароза со помош на ензими, нудејќи одржлива алтернатива на традиционалното земјоделство.
Оваа технологија користи метанол — хемиско соединение со низок јаглероден отпечаток, кое може да се добие од индустриски отпад или директно од CO₂. Според објавената студија, ваквиот вештачки процес на конверзија на CO₂ во храна и хемикалии нуди потенцијал за решавање на еколошки и популациски предизвици, како и придонес кон климатска неутралност.
Истражувачите ја надградиле претходната работа на научници од Институтот за хемиска физика во Далиан, кои во 2021 година развија метод за нискотемпературна конверзија на CO₂ во метанол. Новиот ivBT-систем достигнува импресивна стапка на конверзија од 86%, што претставува голем чекор во областа на биопроизводството. Системот не само што произведува сахароза, туку и скроб, и тоа со помала потрошувачка на енергија во споредба со традиционалните методи.
Врз основа на успехот со сахарозата, системот е прилагоден и за конверзија на други соединенија, како што се фруктоза, амилоза, амилопектин, целобиоза и целоолигосахариди. Се очекува оваа технологија да одигра клучна улога во борбата против климатските промени и во обезбедувањето храна за растечкото светско население, кое до крајот на векот би можело да достигне 10 милијарди луѓе, пренесува NDTV.
