Петта планета е откриена во зоната погодна за живот на соседна ѕвезда, каде што би можеле да постојат услови за течна вода и потенцијално живот.
Сместена на околу 35 светлосни години од Земјата, L98-59 е ладна темноцрвена џуџеста планета за која веќе е познато дека содржи компактен систем од мали, карпести планети. Најновото откритие, предводено од истражувачи од Институтот „Тротје“ за истражување на егзопланети при Универзитетот во Монтреал, Канада, го потврди присуството на супер-Земјата L98-59 f со минимална маса од 2,8 пати поголема од нашата планета.
Новооткриената егзопланета следи речиси совршена кружна орбита од 23 Земјини денови околу својата ѕвезда. Овој свет добива приближно иста количина ѕвездена енергија како Земјата, што го сместува во зоната погодна за живеење на ѕвездата, односно опсегот на растојанија каде што течна вода би можела да постои под соодветни атмосферски услови.
„Наоѓањето умерена планета во таков компактен систем го прави ова откритие особено возбудливо. Тоа ја истакнува извонредната разновидност на егзопланетарните системи и ги зајакнува аргументите за проучување на потенцијално погодни за живеење светови околу ѕвезди со мала маса“, рече Шарл Кадје, истражувач на универзитетот и главен автор на студијата.
L98-59 f беше откриена со повторна анализа на податоците од спектрографите HARPS (High Precision Radial Velocity Planet Searcher) и ESPRESSO (Echelle Spectrograph for Rocky Exoplanet and Stable Spectroscopic Observations) на Европската јужна опсерваторија (ЕСО). Бидејќи егзопланетата не транзитира или не поминува пред својата ѕвезда домаќин од наша перспектива, астрономите ја детектирале со следење на суптилните промени во движењето на ѕвездата предизвикани од гравитационото привлекување на планетата.
Со комбинирање на податоците од спектрографот TESS (Tranziting Exoplanet Survey Satellite) на НАСА и вселенскиот телескоп James Webb, и користејќи напредни техники за филтрирање на ѕвездениот шум, истражувачите биле во можност да ја одредат големината, масата и клучните својства на сите пет планети.
Студијата покажува дека L98-59 b, највнатрешната планета, е само 84% од големината на Земјата и половина од нејзината маса, што ја прави една од најмалите измерени егзопланети. Плимските сили би можеле да предизвикаат вулканска активност на двете највнатрешни планети во системот, додека невообичаено малата густина на третата сугерира дека би можело да биде свет богат со вода, различен од кој било друг во нашиот Сончев Систем. Оваа разновидност нуди ретка можност да се проучи формирањето и еволуцијата на планетарните системи надвор од нашиот, рече тимот.
„Овие нови резултати ја даваат најцелосната слика што некогаш сме ја имале за фасцинантниот систем L 98-59. Тоа е моќна демонстрација на она што можеме да го постигнеме со комбинирање на податоци од вселенски телескопи и високопрецизни инструменти на Земјата, и ни дава клучни цели за идните атмосферски студии со вселенскиот телескоп James Webb“, рече Кадје.
Бидејќи L98-59 е мал и близок, неговите планети се особено погодни за атмосферски студии. Ако L98-59 f има атмосфера, телескопите како James Webb би можеле да детектираат водена пареа, јаглерод диоксид или дури и биолошки потписи.
