Samsung не се откажува од концептот на ултратенок Android телефон. Моментално работи на отстранување на грешките од постојниот модел, па така следниот Galaxy S26 Edge ќе пристигне со поголема батерија и уште потенко тело.
Ултратенкиот телефон на Samsung, S25 Edge, кој беше лансиран во мај оваа година, има дебелина од само 5,8 мм и тежи 163 грама, што го прави исклучително лесен и тенок Android уред. Иако првично беше претставен како премиум модел, неговата продажба не ги исполни очекувањата на пазарот.
Како главна причина за послабиот успех се наведува тоа што одредени спецификации биле жртвувани во корист на екстремно тенкиот профил – пред сè малата батерија со капацитет од 3.900 mAh, како и недостатокот на телефото леќа, и покрај присуството на главна камера од 200 MP, што не се покажа како добитна комбинација за корисниците.
Според најновите информации објавени од познатиот инсајдер IceUniverse, наследникот на моделот S25 Edge – Galaxy S26 Edge – ќе донесе големи подобрувања токму во тие области. Телото би можело да биде уште потенко, додека капацитетот на батеријата ќе биде поголем. Иако конкретните спецификации сè уште не се потврдени, самата најава предизвика бројни позитивни реакции и го зголеми интересот на пазарот.
Исто така, кружат гласини дека Samsung планира целосно да ја укине варијантата S26 Plus следната година и да ја замени со моделот S26 Edge, со што целата S26 серија би одела кон уште потенок и полесен дизајн. Клучното прашање ќе биде како S26 Edge ќе биде позициониран во однос на останатите модели од серијата и на кој начин ќе се разликува од нив, пренесува LTN.
