Во повеќе од 70 проценти од денешните паметни телефони се вградува батерија со капацитет од најмалку 5000 mAh, но реалната автономија кај најсовремените модели сега започнува од 6000 mAh па нагоре.
Порано, паметните телефони со батерија од 5000 mAh се сметаа за уреди со прилично голема работна автономија. Сепак, најновите податоци покажуваат дека овој стандард денес е надминат. Според истражувањето на компанијата Counterpoint Research, во првиот квартал од 2025 година дури 71% од паметните телефони во светот имале батерија со капацитет од 5000 mAh или повеќе, додека 10% од уредите имале батерии поголеми од 6000 mAh.
Ваков голем капацитет на батерија, кој претходно беше резервиран за одредени модели од средна класа, сега сè почесто се среќава и кај премиум и водечки модели. Трендот јасно покажува дека капацитетот од 5000 mAh станува основен минимум за поновите уреди, додека ознаката „голема батерија“ сè повеќе се врзува за 6000 mAh и повеќе.
Причината поради која претходно беше тешко да се зголеми капацитетот на батеријата лежи во нејзината физичка големина. Поголемата батерија зафаќа повеќе простор, што може да влијае на можностите за вградување на други клучни компоненти, како што се камерите, процесорите и системите за ладење. Исто така, поголемите батерии влијаат и на ергономијата и чувството во рака, што претставуваше проблем за дизајнот на премиум уредите кои тежнеат кон рамнотежа помеѓу перформансите и естетиката.
Решението за овој проблем сè повеќе се наоѓа во т.н. силициум-карбонски батерии (Si-C батерии), кои овозможуваат повисока енергетска густина со помала зафатнина и побрзо полнење во споредба со класичните литиум-јонски батерии. Брендови како Honor, OnePlus и realme веќе ги имаат имплементирано во своите нови модели.
Телефони како OnePlus 13 и realme GT 7 успеваат да го задржат стандардниот тенок дизајн на куќиштето, а сепак да понудат батерии со капацитет поголем од 6000 mAh.
Заклучокот од овој тренд е јасен – очекувањата на корисниците се дека „лесни, а целодневни“ телефони ќе станат нов индустриски стандард. Корисниците повеќе не мора да избираат меѓу тенок дизајн и долготрајна батерија, бидејќи благодарение на новите технологии, сега можат да имаат и двете во еден уред.
