Во изминатите години, Apple беше предмет на критики поради различни причини — од грешки поврзани со вештачката интелигенција до контроверзните одлуки за дизајн — но бројките не лажат. Ако компанијата од Купертино нешто знае да прави добро, тоа е продажбата на iPhone, а токму сега ја надмина границата од три милијарди продадени уреди. Оваа информација ја потврди директорот на Apple, Тим Кук.
Тоа е навистина импресивна бројка, уште поневеројатна ако се земе предвид дека Apple всушност го забрзува темпото. Првиот iPhone беше претставен во 2007 година, а компанијата достигна милијарда продадени примероци девет години подоцна — односно во 2016 година. Границата од 2 милијарди ја надмина во следните само пет години, а потоа беа потребни уште само четири за да стигне до 3 милијарди. Се чини дека овој тренд ќе продолжи.
Сепак, постои и друга страна на приказната. Висок претставник на Apple, Еди Кју, неодамна изјави дека на луѓето можеби веќе нема да им биде потребен iPhone за десет години — нешто што би требало да биде доста загрижувачко за компанија чиј најголем бизнис е токму продажбата на мобилни телефони. Големиот чекор на Apple кон некој понапреден тип уреди исто така не успеа да ја воодушеви јавноста. Познато е дека првите обиди за додавање значајни AI функции во iPhone, благо речено, не беа најуспешни. Изгледа дека Apple не е баш најподготвен за светот во кој можеби ќе живееме за десет години.
Очигледно дека и Кук е свесен за овој проблем. На конференцијата по објавувањето на кварталните резултати, доби прашање за иднината на телефонот како доминантна мобилна платформа. Во својот одговор тој рече дека компанијата „размислува и за други нешта“, но додаде дека новите технологии „веројатно нема да ги заменат телефоните, туку ќе ги надополнат“. Телефоните изгледа се сигурни на краток рок, но можно е токму нешто што го подготвуваат Сем Алтман и Џони Ајв да го забави Apple во неговиот пат до бројката од четири милијарди продадени iPhone уреди.
