Со поевтиниот MacBook, Apple сака дополнително да го прошири своето пазарно присуство и да привлече купувачи за кои дури и Air моделите беа надвор од буџетот.
Apple веќе следниот месец би можел да започне со производство на нов, поевтин MacBook кој нема да биде дел од ниту една постоечка линија на нивни лаптопи. Како што дознава тајванскиот DigiTimes, компонентите веќе се подготвени, а доколку сè оди според планот, излегувањето на пазарот би можело да се случи веќе на почетокот на 2026 година.
Што се однесува до спецификациите на овој поевтин MacBook, наводно ќе го придвижува Apple A18 Pro – истиот SoC кој го користи и актуелниот iPhone 16 Pro. Тоа ќе биде првиот лаптоп на Apple кој ќе користи SoC од iPhone, но и покрај тоа, се очекува да постигне значително подобри резултати во single-core тестовите од MacBook моделите со M1 SoC, додека во multi-core перформансите би можел да понуди слични можности.
Сето ова ќе се одрази и на цената, која во САД би требало да изнесува 699 долари за основниот модел, односно околу 800 евра во Европа. Не е познато колкава ќе биде вградената меморија, но бидејќи станува збор за најслабиот лаптоп на Apple, најверојатно ќе започнува од 256 GB, а за надградба, како и обично, ќе мора да се плати висока цена.
