iPhone 17 Pro се враќа со алуминиумски дизајн, метален заден дел, поголема батерија и унапредени камери, што би можело да го промени индустрискиот тренд.
Apple планира во септември да ја претстави новата серија iPhone 17, а на интернет се појавија фотографии од компоненти кои наводно му припаѓаат на моделот iPhone 17 Pro. Според извори од платформата Naver, објавените фотографии доаѓаат директно од фабрика и откриваат дека годинашните модели ќе добијат целосно нов унибоди алуминиумски дизајн.
Овој детаљ ги потврдува претходните гласини дека iPhone 17 Pro ќе се откаже од титаниумската рамка што се користеше во последните две генерации, враќајќи метална задница за првпат по серијата iPhone 7 од 2016 година. Потоа, Apple премина на стаклени задници од iPhone 8 до денес, па се очекува овој потег повторно да означи пресвртница во индустрискиот дизајн на паметните телефони.
Враќање на алуминиумот кај iPhone 17 Pro серијата
Металната задница носи неколку предности: поголема отпорност на падови и подобра дисипација на топлина, но може да биде голем предизвик за безжичното полнење. Исто така, постои опасност од повторување на проблемите со виткање на куќиштето, познати од „bendgate“ аферата. Сепак, аналитичарите веруваат дека Apple со внимателен инженеринг ќе ги избегне овие проблеми.
Покрај дизајнот на надворешноста, откриени се и информации за внатрешната структура на iPhone 17 Pro Max моделот. Тој ќе користи батерија во метално куќиште заедно со технологија на парна комора за ладење, со што значително ќе се подобрат термалните перформанси. Уште една голема промена е подебелото куќиште кое овозможува вградување на батерија со капацитет од над 5.000 mAh – најголема во историјата на iPhone уредите.
Кога станува збор за камерите, iPhone 17 Pro Max треба да добие телефото камера од 48 MP со оптички зум до 8x, додека предната камера ќе биде унапредена на 24 MP. Стандардниот iPhone 17 Pro најверојатно ќе задржи максимум 5x оптички зум, што ќе биде една од клучните разлики меѓу овие два модели.
Овие промени навестуваат дека Apple планира со серијата iPhone 17 да донесе најзначајниот редизајн и најголемите технички новини во последниве години, комбинирајќи издржливост, поголема автономија на батеријата и напредни фотографски можности.
