Научниците го пронајдоа изворот на мистериозен радио сигнал од вселената, поврзан со галаксијата NGC 4141, оддалечена 130 милиони светлосни години.
Тим од Harvard & Smithsonian Центарот за астрофизика и Универзитетот McGill во Канада успеа да го лоцира потеклото на еден од најсветлите брзи радио-блесоци (FRB) досега откриени. Сигналот доаѓал од галаксијата NGC 4141, оддалечена 130 милиони светлосни години од Земјата. Ова е првпат еден ваков силен сигнал прецизно да биде поврзан со конкретна локација во соседна галаксија.
Брзите радио-блесоци се исклучително кратки и моќни бранови на радио енергија кои траат само неколку милисекунди. Научниците веруваат дека настануваат за време на екстремни космички настани, како што се супернови кои зад себе оставаат густи и силно магнетизирани неутронски ѕвезди – магнетари. Сепак, одредени истражувачи не ја исклучуваат ниту можноста за вештачко потекло, односно сигнали испратени од напредна вонземјанска цивилизација.
Откривање на потеклото на FRB сигналот
Сигналот откриен во март, наречен FRB 20250316A или „RBFLOAT“, потекнувал од правецот на соѕвездието Голема кола. Прецизно бил лоциран на периферијата на галаксијата NGC 4141, во област со големина на едно ѕвездено јато. За споредба, поголемиот дел од досега откриените FRB сигнали доаѓале од далечини од милијарди светлосни години, што ја прави оваа локација „релативно блиска“.
Клучна улога во откривањето имал канадскиот телескоп CHIME, специјализиран за фаќање на вакви ретки блесоци. Благодарение на новите „outrigger“ телескопи поставени низ Северна Америка, истражувачите успеале да ја одредат точната локација на изворот, речиси како да „забележат паричка од 200 километри растојание“. Потоа, научниот тим со помош на вселенскиот телескоп James Webb (JWST) направил инфрацрвени снимки кои откриле слаб објект наречен NIR-1. Тој би можел да биде црвен џин во завршна фаза на животот, ѕвезда која крие невидлив придружник како магнетар, или дури привремен „одек“ на самиот радио-блесок.
Иако сигналот е неверојатно силен, научниците истакнуваат дека нема докази за постоење на интелигентен образец или порака. Наместо тоа, ова откритие претставува пресвртница во истражувањето: сега е можно не само да се детектираат FRB, туку и да се следи нивното потекло со прецизност до поединечни ѕвезди.
Како што наведува професорот Едо Бергер од Харвард, можноста да се изолираат ѕвезди околу изворот на FRB сигналот отвора ново поглавје во потрагата по одговорот на прашањето што навистина ги предизвикува овие мистериозни космички „блесоци“. Без разлика дали се работи за умирање ѕвезди, магнетари или уште непознати објекти, секое ново откритие нè приближува кон разбирањето на една од најголемите вселенски мистерии на денешницата.
