Xiaomi официјално го претстави HyperOS 3.0 базиран на Android 16, наменет за мобилните телефони на компанијата, а исто така ја објави и листата на уреди што ги исполнуваат условите за бета тестирање.
Веднаш на почеток треба да се нагласи дека најавата се однесува на кинескиот пазар, па функциите може да се разликуваат, а веројатно и датумите на лансирање ќе бидат различни.
Новиот HyperOS 3.0 носи мало визуелно освежување со нови икони, нова статусна лента и додавање на Super Island. Покрај тоа, нуди подобрувања во AI можностите и интерни прилагодувања за зголемени перформанси.
Функцијата Super Island е многу слична на Dynamic Island кај iOS. Таа овозможува контекстуални информации во реално време за активностите на апликациите, состаноци, резервации, контрола на репродукција на медиуми и многу повеќе. Единствената разлика е што Super Island на HyperOS останува активен во панелот со известувања.
Новиот оперативен систем има и свежи икони со поедноставен дизајн и стил налик на iOS. Тука е и прилагодлива почетна мрежа (home grid), како и редизајнирана статусна лента.
Xiaomi претстави и нова, редизајнирана апликација за бирање броеви, но ова веројатно се однесува само на кинескиот пазар, бидејќи кинеската верзија на ROM користи сопствена апликација за телефонирање, додека глобалните и европските ROM верзии ја користат апликацијата на Google.
Исто како Oppo и OnePlus, Xiaomi овозможува поврзување со iPhone, iPad и Mac, како и беспрекорно пренесување на податоци.
Xiaomi ја сподели листата на уреди кои ги исполнуваат условите за HyperOS 3.0 Beta програмата, заедно со датумите на издавање. Се очекува стабилната верзија на HyperOS 3.0 да пристигне во четвртиот квартал од оваа година.
29 август: Xiaomi 15 Ultra, Xiaomi 15S Pro, Xiaomi 15 Pro, Xiaomi 15, Redmi K80 Pro, Redmi K80 Extreme Edition, Xiaomi Pad 7S Pro 12.5, Xiaomi Pad 7 Pro, POCO F7
17 септември: Xiaomi MIX Flip 2, Redmi K80, Xiaomi Pad 7 Ultra, Xiaomi Pad 7, Redmi K Pad, Xiaomi TV S Pro Mini LED серија 2025, Xiaomi TB S Pro Mini LED серија
30 септември: Xiaomi MIX Fold 4, Xiaomi MIX Flip, Xiaomi 14 Ultra/Titanium Special Edition, Xiaomi 14 Pro/Titanium Special Edition, Xiaomi 14, Redmi K70 Pro, Redmi K70 Extreme Edition, Redmi K70, Redmi K70E, Xiaomi Pad 6S Pro 12.4
