Металниот кристал може да ослободува и апсорбира кислород на ниски температури, отворајќи нови можности за примена во областа на чистата енергија и паметните технологии.
Научници од Јужна Кореја и Јапонија открија нов тип кристал кој се однесува речиси како жив организам – може да „вдишува“ и „издишува“ кислород. Овој метален оксид, изработен од стронциум, железо, кобалт и кислород (SrFe0.5Co0.5O2.5), е способен да ослободува кислород кога ќе се загрее во гас, а потоа повторно да го апсорбира, без притоа да ја изгуби својата стабилност.
За разлика од веќе познатите метални оксиди кои постигнуваат слични ефекти, овој кристал тоа го прави на значително пониски температури. Додека традиционалните технологии бараат помеѓу 600 и 1000 степени Целзиусови, новиот кристал ослободува кислород веќе на 400 степени. Тоа го прави исклучително значаен за развој на горивни ќелии и други решенија во областа на чистата енергија.
Кристал кој ги менува правилата во развојот на зелената енергија
Според зборовите на Хјонгџин Џин од Националниот универзитет Пусан, кристалот може да се набљудува како материјал на кој му се „додадени бели дробови“, бидејќи во секој момент може да реагира и да ја менува својата структура. Особено е важно што, откако ќе апсорбира кислород, повторно се враќа во првобитната форма, што отвора можности за долготрајна и стабилна примена.
Една од најголемите предности на ова откритие е неговата примена во цврсти оксидни горивни ќелии, кои можат да го претворат водородот во електрична енергија со поголема ефикасност од постоечките решенија. Освен тоа, материјалот би можел да се користи и во паметни прозорци, кои самостојно би се прилагодувале на внатрешните и надворешните услови, како и во еколошки градежни материјали.
Сепак, предизвик претставува фактот дека еден од главните елементи е кобалт, чијашто експлоатација е поврзана со еколошки и хуманитарни проблеми ширум светот. Тоа би можело да ја ограничи масовната примена на овој материјал и да поттикне понатамошни истражувања за замени.
Откритието покажува дека концептот на „дишење“ кислород можеби повеќе нема да биде ограничен само на живи суштества, туку и на материјали кои би можеле да ја поттикнат следната голема енергетска револуција, пренесува Popular Mechanics.
