За многу корисници, апликацијата Google Maps е апсолутно незаменлива, а компанијата Google ќе го направи својот навигациски алат уште покорисен на Android 16.
Користејќи ја новата функција воведена во најновата верзија на својот мобилен оперативен систем, Google Maps добива многу корисна поддршка за Live Updates нотификациите.
Live Updates претставува нов тип известувања, кои се користат во многу специфични околности како што се следење на лет, следење на достава или навигација. Google експериментира со интеграција во Google Maps, а доколку се покаже успешна, функцијата може целосно да ги промени правилата на играта.
Важни разлики на Live Updates се тоа што се појавуваат над сите останати известувања, така што секогаш се видливи. Дополнително, можат да се појават на заклучен екран и на Always-on-Display, поради што овие нотификации се видливи во секој момент.
Во суштина, тоа се известувања во стил на лента за напредок, кои обезбедуваат брзи информации за тоа како напредува патувањето или задачата. Тоа е нешто за кое Google зборува веќе некое време, а што предизвикува големо возбудување и интерес.
Сепак, кога Google ја објави Android 16 QPR Beta 1 порано оваа година, Live Updates не беше дел од неа, што предизвика разочарување. Но, Google не ја заборави целосно оваа новина, што го покажуваат Android QPR Beta 2 и Beta 2.1.
Снимки на екранот откриваат како Live Updates изгледа во живо на Google Maps, а ги сподели Android Authority. Live Updates е начин да се осигура дека деталите за навигациските насоки нема да се изгубат во критичен момент. Сè што треба да знае корисникот никогаш не е далеку, така што погрешно свртување или влегување во слепа улица треба да станат минато.
Временската рамка за воведување на оваа супер корисна функција е малку тешко предвидлива, особено бидејќи корисничката база на почеток ќе биде мала, поради тоа што е врзана за Android 16. Иако издавањето на Android 16 QPR 1 е пред врата, точниот датум не е познат, но се очекува да се појави во рок од неколку недели. Сепак, ќе биде потребно време за да стигне до поголем број уреди.
