iPhone Air е дебел само 5,6 мм, што го прави најтенкиот iPhone досега. Рамката е изработена од титаниум со полиран финиш, а се одликува со прилично голем дисплеј од 6,5 инчи
Apple вечерва ја претстави новата iPhone 17 серија смартфони, како и новата серија паметни часовници Apple Watch Series 11 и Apple Watch Ultra 2 и новите безжични слушалки AirPods Pro 3. На радост на корисниците, iPhone 17 конечно доби 120-херцен екран, а iPhone 17 Pro и Pro Max имаат целосно редизајниран дизајн и unibody куќиште. Но, целата приказна, секако ја зачини новиот модел iPhone Air.
Се работи за најтенкиот iPhone досега, за кој се зборуваше со месеци. Изработен е од титаниум, со полирана рамка во финиш на огледало, што му дава луксузен изглед. Со Ceramic Shield стакло од двете страни, Apple го опишува како „најиздржливиот дизајн досега“, нагласувајќи дека Air ја спојува префинетоста и отпорноста во најтенкото куќиште на iPhone некогаш направено.
Мобилниот телефон е дебел само 5,6 мм. И покрај таа рекордна тенкост, Apple тврди дека станува збор за нивниот најиздржлив модел досега, што на прв поглед звучи речиси контрадикторно.
Куќиштето е изработено од титаниумска рамка, материјал кој Apple го опишува како „есенцијален“ за ваков тип уред, при што нагласува дека ги надминува сите стандарди за отпорност на свиткување. И предната и задната страна се покриени со Ceramic Shield 2 стакло, со подобрена заштита од гребнатини и рефлексии. Задното стакло, според Apple, сега е дури четири пати поотпорно на кршење во однос на претходната генерација.
За разлика од останатите модели, Air има само една камера на задната страна, со што Apple го нагласува неговиот минималистички и „есенцијален“ карактер. Достапен е во четири бои – црна, бела, златна и сина – а комбинацијата од тенок профил, титан и Ceramic Shield претставува интересен спој на луксуз и издржливост.
Кога станува збор за SoC, iPhone Air користи A19 Pro. Станува збор за 6-јадрен процесор со подобрени јадра за перформанси, па Apple тврди дека тоа е најбрзиот процесор во кој било паметен телефон. При тоа е оптимизирана и енергетската ефикасност, што наводно се чувствува во секојдневните задачи.
Графичкиот дел го сочинува 5-јадрен GPU со втора генерација dynamic caching архитектура и унифицирана компресија на слика, што носи подобри перформанси во игрите и обработка на визуелна содржина. Посебен акцент е ставен и на вештачката интелигенција – невронски акцелератори се вградени во секое GPU јадро, а Apple истакнува дека Air по компјутерска моќ достигнува ниво на MacBook Pro лаптоп. Доста добро, ако е вистинито.
Air исто така прв воведува N1 чип за безжична поврзаност, развиен од Apple, кој носи поддршка за Wi-Fi 7, Bluetooth 6 и Thread. Со тоа се подобруваат функции како AirDrop и Personal Hotspot, а дополнително беше претставен и Apple C1X модем кој е двојно побрз и троши 30 проценти помалку енергија. Сето тоа го прави Air најенергетски ефикасниот iPhone досега произведен.
Apple и кај iPhone Air продолжува со идејата за Fusion систем на камери. На задната страна се наоѓа 48-мегапикселна Fusion главна камера со голем сензор и фокусна должина од 26 мм, која овозможува и 2x телефото режим. Покрај неа доаѓа и 12-мегапикселна телефото камера со фокусна должина од 52 мм, што заедно дава флексибилност каква досега не сме виделе кај модели со само една физичка камера.
Apple тоа маркетиншки го нарекува „четири објективи во џебот“, бидејќи Fusion системот овозможува користење на главниот сензор и за ултраширок кадар, а покрај тоа тука е и новата 18 MP предна Center Stage камера за поквалитетни селфи фотографии и видео повици.
iPhone Air ќе биде првиот iPhone кој глобално ќе доаѓа исклучиво со eSIM, без слот за физичка картичка. Како што беше објаснето на претставувањето, тоа е направено за да се максимизира просторот за батерија. Во транспарентниот модел прикажан на сцената се виде дека внатрешноста речиси целосно ја зазема батеријата.
Apple тврди дека уредот и покрај потенкиот профил и понатаму нуди целодневно траење на батеријата, иако не наведе точен број часови или капацитет. За дополнително продолжување на автономијата, воведена е и новата функција Adaptive Power Mode, која го анализира начинот на користење на iPhone и автоматски ја оптимизира потрошувачката на енергија.
Беа претставени и нови додатоци, меѓу кои се издвојува нископрофилната MagSafe батерија. Во комбинација со неа, iPhone Air овозможува до 40 часа репродукција на видео, што е двојно повеќе од вградената батерија.
Цената изнесува 999 долари.
