Apple на вчерашниот медиумски настан ги претстави и AirPods Pro 3 безжични слушалки. Новиот модел пристигнува со подобрено активно поништување на бучава (Active Noise Cancellation), подобро вклопување во увото, унапреден звук и IP57 отпорност на пот и вода.
Оваа генерација доаѓа со значително подобрени микрофони и напредна компјутерска обработка на звукот, кои носат многу подобро искуство при слушање. Благодарение на новите продолжетоци за уши со пена, изолацијата на бучава е подигната на ново ниво, а активното поништување на бучава (ANC) сега е двојно посилно во споредба со AirPods Pro 2.
Сето тоа резултира со подлабок и попрецизен бас, поширока звучна сцена и појасни вокали. Од Apple велат дека специјално дизајнираната повеќеканална акустична архитектура дополнително ја истакнува единственоста на овие слушалки, за кои смело тврдат дека имаат „најдобро ANC во светот“. Иако по големина се доволно компактни да соберат во џеб, Apple тврди дека нудат перформанси споредливи со класичните over-ear модели.
Слушалките добиваат и нова функција Live Translation, потпомогната од Apple Intelligence. Доволно е да се направи одреден гест за да се активира моментално преведување на разговорот, а ANC притоа автоматски ќе го намали гласот на соговорникот и ќе го репродуцира назад на вашиот јазик.
Кога станува збор за удобноста, Apple вели дека ова се најудобните AirPods слушалки досега. „Анализиравме повеќе од 10 илјади 3D-скенови на уши. Секој AirPod сега е помал, а формата е редизајнирана за подобро да се приспособи на ушниот канал. Сега нудиме пет големини на продолжетоци за уши кои се најстабилни и најдобри досега“, велат од Apple.
Третата генерација на AirPods Pro ќе има и неколку корисни карактеристики за рекреативци и спортисти. Прво, слушалките се дополнително заштитени од пот и прашина. Второ, ќе имаат најмал сензор за отчукување на срце на Apple и своевиден гласовен мотиватор при вежбање. Батеријата ќе трае до 8 часа со ANC, односно 10 часа во Transparency режим. Цената изнесува 249 долари.
