Камен примерок од кратерот Језеро на Марс, собран од роверот на NASA, Perseverance содржи минерали кои би можеле да бидат знак за древна микробна активност, соопштија научниците.
Истражувањето објавено во списанието Nature покажува дека во примерокот, наречен Sapphire Canyon, се откриени минералите вивианит и грејгит. На Земјата, овие соединенија често настануваат како резултат на реакции предизвикани од микроорганизми.
„Овие реакции се појавиле кратко по таложењето на калта на дното на некогашното езеро. На Земјата такви процеси често ги движи активност на микроби,“ изјави водечкиот автор на студијата, планетарниот научник Џоел Хуровиц од Универзитетот Стони Брук.
Сепак, тој предупреди дека постојат и небиолошки процеси кои можат да ги произведат истите минерали. „Не можеме да исклучиме дека природата едноставно имитирала траги од живот,“ додаде Хуровиц.
„Perseverance“ се наоѓа на Марс од 2021 година и го истражува кратерот Језеро – регион за кој научниците веруваат дека пред 3,5 милијарди години бил исполнет со вода. Примерокот е собран во јули 2024 година од формацијата Bright Angel.
Научниците очекуваат дека конечен одговор дали минералите се навистина биосигнатури ќе може да се добие само ако примероците се донесат на Земјата за подетални анализи.
