Од новите iPhone уреди, купувачите најмногу го бараат iPhone 17 Pro Max, кој воедно е и најскапиот со почетна цена од 1.450 евра на европскиот пазар.
По послабото стартување на iPhone 16 минатата година, Apple со новата генерација постигна значаен пресврт. Како што наведува долгогодишниот аналитичар на Apple, Минг-Чи Куо, побарувачката за iPhone 17 серијата во првата недела на преднарачки ги надминала минатогодишните резултати, а роковите за испорака веќе се продолжени за неколку недели.
Имено, Apple во третиот квартал од 2025 година ги зголеми производствените цели за iPhone 17, 17 Pro и 17 Pro Max за 25 проценти во споредба со истото раздобје минатата година, но и покрај поголемиот обем на производство, проценетите рокови за испорака останаа подолги, што укажува на силна побарувачка. Најбаран модел и понатаму е iPhone 17 Pro Max, за кој производството е зголемено дури за 60 проценти во однос на минатогодишниот 16 Pro Max.
Што се однесува до најтенкиот iPhone Air, Apple го произвел трипати повеќе во однос на минатогодишниот iPhone 16 Plus кој го заменува, а засега нема доцнења во испораките. Куо напоменува дека продажбата на Air ќе треба да се следи подолго време пред да се донесе правична проценка за неговата популарност.
