Русија наскоро ќе има конкуренција за сателитскиот интернет сервис Старлинк, изјави во среда шефот на руската вселенска агенција Роскосмос, Дмитриј Баканов, нагласувајќи дека земјата мора да ги надмине „застарените шеми“ што му овозможија на Space X да доминира во вселената.
Старлинк тврди дека управува со најголемата сателитска констелација во светот со повеќе од 8.000 сателити. Руските официјални лица го сметаат Илон Маск за клучна личност која го револуционизирала лансирањето на вселенски летала на штета на Русија.
Баканов, новиот 39-годишен директор на Роскосмос, призна во разговор со рускиот ТВ водител Владимир Соловјов дека агенцијата морала да се откаже од „инерцијата“ и да привлече повеќе млади експерти.
Тој потврди дека Русија работи на создавање алтернатива на Старлинк, мрежата на компанијата Спејс Икс која обезбедува интернет услуги преку сателити во ниска орбита, особено корисни во оддалечени области и воени зони. Во моментов Старлинк е широко користен од украинските сили во војната со Русија.
„Веќе проверивме неколку тест вселенски летала во орбитата и моделите за производство се соодветно модифицирани“, рече Баканов. „Се движиме со забрзано темпо во оваа насока“, додаде тој.
Руската воздухопловно-вселенска компанија Биро 1440 моментално развива сателитски систем во ниска орбита за глобална дистрибуција на широкопојасен интернет.
Баканов додаде дека Русија научила од минатите грешки, вклучително и случајот од 2002 година кога Москва го отфрли обидот на Маск да купи интерконтинентална балистичка ракета за вселенски цели. Според биографијата на Маск од 2015 година од Ешли Венс, руските претставници во тоа време го одбиле Маск како недоверлив, што го мотивирало да го развие својот пат и со тоа да ги намали цените на руските вселенски услуги, пренесе Ројтерс.
