На претстојниот настан Meta Connect се очекуваат паметни очила со екран, нови AI алатки и метаверзум иновации.
Meta Connect, годишниот настан посветен на AR, VR, AI и метаверзумот, ќе се одржи следната недела и веќе сега привлекува огромно внимание. За разлика од претходните години, годинашниот формат носи промени – Марк Закерберг ќе го одржи воведното излагање во среда, на 17 септември во 17 часот по локално време, додека делот за девелопери е планиран за 18 септември наутро.
Најголем фокус ќе имаат паметните очила. Meta ќе ја претстави следната генерација на своите Ray-Ban очила, интерно наречени „Hypernova“, кои за првпат ќе имаат екран. Иако нема да нудат целосно AR искуство како прототипот Orion, екранот ќе прикажува известувања и прегледи на фотографии. Покрај тоа, очилата ќе имаат нараквица за контрола преку движење на раката. Се очекува цената да биде околу 800 долари, што ги сместува во повисок сегмент, а во продажба ќе се појават подоцна годинава.
Покрај Ray-Ban моделите, најавени се и Oakley очила без екран, со една камера, како и освежени верзии на постојните Meta Ray-Ban модели. EssilorLuxottica, партнерот во производството, веќе најави „специјална година“ и дополнителни соработки. Истовремено, планирано е отворање на платформата за повеќе трети страни, што значи дека девелоперите би можеле да развиваат нови функционалности за очилата надвор од Meta екосистемот.
АИ, како и претходните години, ќе биде централна тема. Meta AI сега има над една милијарда месечни корисници, а се очекуваат нови функции во апликациите и на очилата. Според извештаи, компанијата развива и нови чат-ботови за јазични подрачја надвор од англискиот јазик. Закерберг би можел да претстави и детали од својата визија за „суперинтелигенција“, иако извештаите укажуваат на доцнење во развојот на моделот Llama 4.
Кога станува збор за метаверзумот, се очекуваат софтверски новости за Horizon Worlds, вклучувајќи и NPC ликови генерирани со АИ. Иако нема да има нови Quest уреди, можно е да има вести за партнерства со ASUS, Lenovo и Xbox, како и за идни VR уреди со следење на погледот и изразите на лицето. Посебно внимание може да привлече и новата верзија на „Codec“ холографските аватари.
Meta Connect 2025 ветува дека ќе биде едно од најзначајните изданија досега, бидејќи ги обединува хардверот, АИ и метаверзумот во обид да ја дефинира следната фаза на дигиталното искуство, пренесува Engadget.
