Nvidia вложува 100 милијарди долари во OpenAI за најголемиот инфраструктурен проект за вештачка интелигенција во историјата, со планови за изградба на AI центри со капацитет од 10 GW. Проектот би можел да ја редефинира иднината на вештачката интелигенција.
Nvidia и OpenAI најавија историско партнерство кое вклучува инвестиција од дури 100 милијарди долари и изградба на AI инфраструктура од невидени размери. Планирано е во наредните години да бидат имплементирани најмалку 10 гигавати Nvidia системи, што претставува најголемиот поединечен инфраструктурен проект во индустријата на вештачката интелигенција досега.
„Ова е најголемиот AI инфраструктурен проект во историјата. Нашата цел е да изградиме платформа што ќе ја донесе вештачката интелигенција од лабораториите во реалниот свет,“ изјави Џенсен Хуанг, основач и извршен директор на Nvidia.
OpenAI, компанијата позната по развојот на ChatGPT, ќе користи милиони Nvidia GPU-ја за следната генерација на истражувања и имплементација на AI модели. Првата фаза на новите дата центри, засновани на платформата Nvidia Vera Rubin, започнува во втората половина на 2026 година и ќе биде насочена кон поместување на границите во тренирањето и процесирањето во реално време на AI модели.
Сем Алтман, извршен директор на OpenAI, го нагласи значењето на ова партнерство: „Оваа инвестиција е горивото што ни е потребно за да ги унапредиме моделите, да ги прошириме можностите и да отвориме нови извори на приходи.“
Иако Nvidia веќе инвестираше во бројни AI стартапи, меѓу кои Cohere, Mistral, Perplexity и Scale AI, досегашните вложувања од околу една милијарда долари бледеат во споредба со сегашниот договор. Само во 2024 година, Nvidia вложи 6,6 милијарди долари во OpenAI, но сегашниот износ претставува далеку поголем исчекор.
OpenAI во овој момент бележи импресивни резултати – годишниот приход во 2025 се проценува на 12,7 милијарди долари, додека бројот на активни корисници неделно ја надмина бројката од 700 милиони. Овој раст создава огромна потреба за компјутерски ресурси, а партнерството со Nvidia токму тоа и го обезбедува.
Иако OpenAI продолжува соработката со гиганти како Microsoft, Oracle и SoftBank, размерите на инвестицијата на Nvidia поставуваат сосема нов стандард во индустријата. Во момент кога глобалната трка за изградба на AI дата центри го достигнува својот врв, сојузот на Nvidia и OpenAI би можел да го одреди идниот правец на развој на вештачката интелигенција и значително да ја потресе конкуренцијата, пренесува ZDNet.
