Руски биолошки истражувачки сателит со повеќе од 30 експерименти слета на 19 септември во степите на Оренбуршката област, по 30 дена поминати во орбитата на Земјата.
Модулот за слетување Bion-M No. 2, наречен „Ноевата арка“ поради примероците што беа транспортирани во вселената, беше лансиран од космодромот Бајконур на 20 август со ракета Soyuz-2.1b.
По лансирањето, леталото беше поставено во поларна орбита на околу 370 до 380 километри височина и со наклон од приближно 97 степени. Теретот на одбраните биолошки примероци во Bion-M No. 2 потоа беше изложен на високо ниво на космичко зрачење.
Фотографии направени од леталото по враќањето на Земјата сугерираат дека слетувањето предизвикало мал пожар во грмушките. Овој пожар брзо бил изгаснат, што им овозможило на спасувачките екипи да пристапат до модулот за слетување.
Три хеликоптери за пребарување со технички експерти слетале во близина на модулот за да ги извадат живите примероци и да започнат првична проверка. Стручњаците веднаш на лице место требало да ја проценат моторичката активност на мухите за да откријат евентуални проблеми со нервниот систем.
Мисијата Bion-M No. 2 беше заеднички напор на Роскосмос, Руската академија на науките и Институтот за биомедицински проблеми при Руската академија на науки (IBMP).
Според IBMP, водечката организација во оваа мисија, првите студии по летот биле извршени во медицински шатор на местото на слетувањето. Биолошките објекти потоа требало да бидат пренесени во лабораториите на IBMP околу полноќ на 20 септември.
Научната програма на експериментите и истражувањата на Bion-M No. 2 се состои од 10 „секции“.
- Првата и втората секција се посветени на експериментални студии за гравитациска физиологија кај животни, со цел развој на нови технологии за поддршка на луѓето за време на летови под комбинирани ефекти на бестежинска состојба и космичко зрачење.
- Третата, четвртата и петтата секција се насочени кон проучување на влијанието на вселенските летови и факторите од вселената врз биологијата на растенија и микроорганизми, како и нивните заедници. Ова се смета за обид за разбирање на општите закони на животот во вселената.
- Шестата, осмата и деветтата секција опфаќаат биотехнолошки, технолошки, физички и технички експерименти.
- Седмата секција претставува комплекс од радиобиолошки и дозиметриски експерименти, неопходни за обезбедување на радијациска безбедност на новите вселенски летала со екипаж.
- Десеттата секција вклучува експерименти подготвени од ученици од различни училишта во Русија и Белорусија.
Еден од експериментите, наречен „Метеорит“, беше спроведен за време на повторното влегување на модулот за слетување. Истражувањето беше насочено кон можноста дека животот на Земјата можеби е донесен од вселената — теорија позната како пансфермија.
Во трупот на капсулата Bion беа вградени базалтни карпи што содржеа микробни соеви, со цел да се процени дали бактериите можат да го издржат огромниот термички стрес при повторното влегување во Земјината атмосфера.
