Индиски тим научници создаде мембрана која ги издвојува јоните за време на испарување и генерира електрична енергија, нудејќи одржлив извор на енергија за мали уреди.
Научници од Indian Institute of Technology (IIT) Indore направија значаен чекор кон развој на уред кој може да произведува електрична енергија од околината, користејќи само воздух и вода. Овој иновативен систем користи мембрана од графен оксид и цинк-имидазол, која формира стабилен слој со микроскопски канали.
Кога мембраната делумно се потопува во вода, таа овозможува водата со испарување да поминува низ каналите. За време на тој процес, позитивните и негативните јони се раздвојуваат на спротивни краеви од мембраната, создавајќи стабилен напон. Професорот Дхирендра К. Рај ја опишува оваа технологија како „самополнечки извор на енергија, придвижен од ништо друго освен од воздух и вода“.
Самополнечки извор на енергија заснован на испарување
Во моментов, мал дел од мембраната може да произведе околу 0,75 волти. Иако тоа не е доволно за напојување на енергетски барани уреди, покажува потенцијал за снабдување на сензори во земјоделството и шумарството, медицински носливи уреди или светилки за време на прекини на струја. Предноста е што системот работи и дење и ноќе, пренослив е, лесен и функционира дури и со нечиста вода.
Индискиот тим ја гледа оваа технологија како решение за рурални и оддалечени подрачја без стабилен извор на електрична енергија. Идејата е ваквите лесни и пристапни мембрани да станат дел од пошироката транзиција кон почисти и поодржливи енергетски решенија.
Оваа иновација се вклопува во поширокиот контекст на истражувања кои ги користат природните процеси за производство на електрична енергија. Други меѓународни тимови веќе експериментираат со создавање струја преку проток на ветер врз водени капки или собирање на електричен набој од дожд.
Иако технологијата од Индија нема целосно да ги замени електричните мрежи, таа ја нагласува можноста за децентрализирано снабдување со струја и намалување на зависноста од фосилни горива. Во свет каде што 91% од вишокот топлина завршува во океаните и го забрзува топењето на глечерите, секоја иновација што придонесува за намалување на загадувањето и емисиите добива дополнително значење, пренесува Yahoo News.
