Bloomberg открива дека Џон Тернус, шефот на одделот за хардвер во Apple е главен кандидат за наследник на Тим Кук, со три клучни предности.
По повеќе од 14 години на чело на компанијата, Тим Кук, кој сега има 64 години, се приближува до моментот кога ќе ја напушти раководната позиција. Иако претходно изјави дека планира да остане во Apple уште неколку години, медиумите сè почесто шпекулираат за неговиот наследник. Според пишувањата на Марк Гурман од Bloomberg, најверојатен кандидат за нов извршен директор на Apple е John Ternus, актуелен потпретседател задолжен за хардвер, а таа опција ја придружуваат три јасни предности.
Првата предност се однесува на возраста и долгорочниот потенцијал. За разлика од поголемиот дел од повозрасните членови на раководниот тим на Apple, Тернус има само 50 години, што значи дека, доколку ја преземе функцијата, би можел да ја води компанијата најмалку во следната деценија. Во време кога многу високи менаџери размислуваат за повлекување, тој делува како природен избор за континуитет и стабилност на компанијата од Купертино.
Џон Тернус – технички експерт и фаворит за идниот директор на Apple
Втората предност лежи во неговото техничко образование и искуство. Додека Тим Кук ја изгради својата кариера преку оперативниот сектор и менаџментот на синџирот на снабдување, Тернус е инженер по образование и својата кариера ја започнал директно во развојот на производи.
Тој одиграл клучна улога во создавањето на повеќе генерации на iPhone, iPad и Mac уреди, а познат е и по соработката со тимот на Apple Silicon. Bloomberg смета дека во момент кога Apple се обидува да ја достигне конкуренцијата во области како вештачка интелигенција, проширена реалност и паметни уреди, токму Ternus би можел да донесе нова техничка енергија во компанијата.
Третата предност е неговата лична харизма и довербата што ја ужива внатре во компанијата. Тернус има добра репутација и меѓу вработените и меѓу корисниците, а Тим Кук му го довери водењето на клучните стратегии за развој на производите. Во последните месеци Apple сè почесто го става Ternus во прв план – тој беше тој што јавно ги претстави новите iPad Air и други производи – со што компанијата, очигледно, го подготвува за поголема улога.
Сè укажува на тоа дека Apple тивко, но систематски, се подготвува за транзиција на лидерството. Ако Тим Кук навистина се повлече во следните години, Џон Тернус би можел да стане првиот инженер на чело на Apple по Стив Џобс – во време кога на компанијата повторно ѝ е потребен визионер што ја разбира технологијата одвнатре.
