Gboard Dial Version претставува уште еден интересен концепт на Google Japan, кој го спојува ретро дизајнот на старите телефони со ротирачки бројчаници и модерните функции.
Google Japan повторно ја покажа својата склоност кон необични технолошки експерименти. По низа креативни концепти за тастатури во изминатите години, сега ја претставија Gboard Dial Version — тастатура која, наместо класични копчиња, користи ротирачки бројчаници, по примерот на старите телефони.
На тастатурата има девет бројчаници со различни големини, под кои се распоредени буквите, бројките и функциските копчиња, вклучувајќи и посебен бројчаник за копчето Enter. Како што функционирале старите телефони, за внесување на некој знак корисникот треба да го стави прстот во соодветната дупка и да го заврти бројчаникот до крај, по што тој автоматски се враќа во почетната позиција.
Додека старите телефони користеле импулсно бирање за пренос на информации, Gboard Dial Version користи модерни сензори кои секое вртење го претвораат во USB сигнал, овозможувајќи тастатурата да функционира како стандарден влезен уред.
Покрај тоа, креаторите на тастатурата отидоа чекор понатаму и осмислија специјална подлога која за време на видео-повици автоматски ја исклучува веб-камерата кога корисникот ќе го остави глушецот врз неа — нешто што тие го опишуваат како „дигитално спуштање на слушалката“.
Како и претходните проекти на Google Japan — како тастатурата во форма на чаша за чај или онаа долга 65 инчи со копчиња наредени во еден ред — и овој уред нема да биде комерцијално достапен. Но, сите кои сакаат да ја испробаат оваа ретро-футуристичка идеја можат да ја направат сами, бидејќи Google го отвори изворниот код и ги објави сите потребни датотеки, 3D модели, PCB-нацрти и список на компоненти, достапни за преземање на GitHub.
