LG го претстави првиот монитор во светот со 6K резолуција и Thunderbolt 5 поврзување. Како што истакнува компанијата, UltraFine evo 6K (модел 32U990A) е специјално развиен за професионални видео-монтажери, графички дизајнери и други креатори кои работат со барачки, податочно интензивни процеси.
Комбинирајќи извонредно остра 6K резолуција (6.144 x 3.456) со врвна прецизност на боите и голема брзина на поврзување благодарение на поддршката за Thunderbolt 5, неговиот 32-инчен 6K HiDPI екран нуди густина на пиксели од 224 PPI, обезбедувајќи поостар, почист текст и прецизни визуелни детали. Мониторот е фабрички калибриран за конзистентен приказ на бои во macOS, покривајќи 98% од DCI-P3 опсегот на бои и 99,5% од Adobe RGB, со што гарантира веродостоен приказ на слика за видео и фото монтажа, како и за печатарска продукција.
Со VESA DisplayHDR 600 сертификат, мониторот одржува конзистентна осветленост и природни бои неопходни за детална графичка и видео обработка. Дополнително, ќе биде воведен Studio Mode со три претходно подесени колор профили за Mac уреди.
Со својата 6K резолуција, мониторот нуди 2,56 пати повеќе пиксели од UHD 4K екранот (3.840 x 2.160), а кога два UltraFine evo 6K монитори се користат заедно во двоен режим, корисниците добиваат огромен работен простор – речиси пет пати поголем од оној што го нуди еден 4K UHD монитор. Благодарение на Thunderbolt технологијата, ваквата повеќемониторска поставка лесно се реализира преку daisy-chain поврзување, што ја зголемува ефикасноста на мултитаскингот и ги оптимизира дигиталните работни процеси.
Новиот монитор, исто така, функционира како професионален hub благодарение на вградениот KVM прекинувач и повеќекратни приклучоци, овозможувајќи беспрекорна работа на Mac и Windows системи. Креаторите можат да прегледуваат мобилна содржина во оптимален формат додека истовремено работат на продукциски задачи.
Компатибилноста со Thunderbolt 5 овозможува лесна интеграција со Mac уреди и служи како ултрабрз центар за SSD дискови, eGPU единици и други периферии. Со можност за пренос на податоци до 120 Gb/s во еден правец – трипати побрзо од Thunderbolt 4 – поддржува рендерирање на 4K содржини во реално време и брз пренос на 8K RAW видео-датотеки, што го прави моделот 32U990A идеален за видео монтажа и AI-базирани процеси на обработка.
Неговиот четиристрано речиси безрамковен дизајн (Virtually Borderless) нуди чиста, минималистичка естетика и впечатливо искуство при гледање, додека ергономските опции за навалување и ротирање овозможуваат удобно уредување на вертикални формати на содржини како YouTube Shorts и Instagram Reels.
LG UltraFine evo 6K мониторот ќе биде достапен во Европа во текот на октомври.
