Samsung го надградува One UI 8.5 со четири нови Galaxy AI опции: Meeting Assistant, Smart Clipboard, Social Composer и Touch Assistant.
Samsung ја подготвува следната голема верзија на својот кориснички интерфејс — One UI 8.5, која ќе донесе четири нови функции засновани на вештачка интелигенција. Откако Galaxy AI дебитираше со серијата Galaxy S24 и One UI 6.1, секоја наредна верзија на системот воведува проширувања во доменот на паметните алатки, кои им помагаат на корисниците со конкретни подобрувања во секојдневната употреба на телефонот.
Според извештајот на порталот ET News, One UI 8.5 ќе ги донесе следните функции: Meeting Assistant, Smart Clipboard, Social Composer и Touch Assistant.
Нови AI функции за попаметен Galaxy екосистем и поголема продуктивност
Meeting Assistant ќе овозможи симултан превод на говорот на странски јазик во реално време за време на состаноци, што може да биде особено корисно при презентации и меѓународни разговори. Touch Assistant ќе му овозможи на корисникот лесно да избере дел од текстот и да го преведе, зачува или организира според потребите.
Smart Clipboard носи напредно препознавање на текст копиран во Clipboard, нудејќи опции како превод, сумирање, пребарување и додавање во омилени. На тој начин, корисникот може да работи со повеќе исечоци од различни апликации без постојано менување меѓу нив.
Social Composer ќе ги анализира фотографиите и автоматски ќе генерира текстуален опис, препознавајќи лица и објекти на сликата. На пример, ако се изберат фотографии од производи на веб-страница за онлајн купување, функцијата може автоматски да напише опис што ќе ги придружува тие слики.
One UI 8.5, кој ќе биде базиран на Android 16, се очекува да донесе и нови икони на апликации, редизајнирани ознаки на статусната лента, унапредена Phone апликација и универзално поле за пребарување. Се очекува Samsung да ја претстави оваа верзија заедно со серијата Galaxy S26 во февруари 2026 година.
