Последниве месеци многу се зборува дека Apple ќе го претстави iPhone Fold во 2026 година, но новите информации укажуваат дека лансирањето сепак ќе биде поместено за 2027 година.
Првиот преклопен телефон на Apple, iPhone Fold би можел да биде претставен подоцна отколку што се очекуваше. Иако досега се шпекулираше дека ќе биде објавен во 2026 година, нов извештај од Јужна Кореја тврди дека уредот ќе го види светлото на денот дури во 2027 година.
Како главна причина за одложувањето се наведува долготрајниот процес на одлучување за клучните спецификации, особено за дизајнот на шарката. Но, доколку Apple сепак успее да ги реши сите проблеми и го претстави iPhone Fold следната година како што првично беше планирано, производството ќе биде ограничено на само 5 до 7 милиони примероци, што е значително помалку од посакуваните 10 до 15 милиони.
Според претходните гласини за кои пишувавме на почетокот на неделата, токму шарката би можела да биде значително поевтина од првичните проценки, но очигледно на Apple му е потребно уште време за финална оптимизација на сè што е неопходно. Околу 65 проценти од потребните шарки ќе ги произведува заедничката компанија на Foxconn и Shin Zu Shing, додека преостанатите 35 проценти ќе ги испорачува Amphenol.
Иако некои би претпоставиле дека Apple ќе ја намали цената на iPhone Fold поради понискиот трошок за шарката, најверојатно тоа нема да биде случај.
