Иако iPhone 17 серијата се продава одлично, трите водечки компании за истражување на пазарот потврдуваат дека Samsung и понатаму го задржува првото место на глобалниот пазар на паметни телефони.
И покрај тоа што iPhone 17 серијата, која е во продажба од септември, предизвика светска еуфорија и одлични резултати во продажбата, Apple сè уште не успеа да ја преземе лидерската позиција од Samsung. Според трите извештаи на најголемите истражувачки компании за пазарни трендови и продажба на паметни телефони во третиот квартал од 2025 година, Samsung го задржува статусот на најголем светски производител на телефони, додека Apple се наоѓа на второто место.
Според податоците на Counterpoint, Samsung држи 19% од глобалниот пазар, Apple 18%, Xiaomi 14%, OPPO 9% и vivo 8%. Иако Apple остана на второто место, забележува раст на испораките од 9% во однос на претходната година, што претставува најбрз раст меѓу првите пет брендови — благодарение на силната продажба на iPhone 17 моделите.
Samsung останува светски лидер, Apple на второ место
Податоците на IDC ја потврдуваат истата поставеност: Samsung зазема 19% од пазарот со 61,4 милиони испорачани уреди, Apple 18,2% со 58,6 милиони, а Xiaomi 13,5% со 43,5 милиони продадени телефони. Следуваат Transsion со 9% и vivo со 8,9%.
Третиот извештај, објавен од компанијата Omdia, исто така покажува идентична пазарна структура: Samsung (19%), Apple (18%), Xiaomi (14%), Transsion (9%) и vivo (9%).
Samsung е убедлив со A серијата и со преклопните модели
Главната причина поради која Samsung ја задржа водечката позиција е неговата доминантна A серија на телефони од средната класа, која се покажа како исклучително популарна на глобално ниво. Дополнително, новите преклопни модели Galaxy Z Fold 7 и Z Flip 7 ја засилија продажбата во текот на третиот квартал.
Аналитичарите сега истакнуваат дека четвртиот квартал ќе биде клучен — продажбата на серијата iPhone 17 и традиционално силната празнична сезона би можеле да му овозможат на Apple за првпат во годината да го надмине Samsung на глобално ниво.
