Сите модели од Galaxy S26 серијата на европскиот пазар би можеле да пристигнат со Samsung Exynos 2600, наместо со неодамна претставениот Snapdragon, според информациите од Counterpoint Research и познати дојавувачи како Ice Universe.
Како што се наведува, Samsung планира 50/50 поделба меѓу Exynos 2600 и Snapdragon 8 Elite Gen 5. Моделите за САД, Кина и Јапонија ќе го користат Qualcomm чипсетот, додека Европа, Јужна Кореја и други пазари ќе добијат Exynos верзии. Слична ситуација имаше и со серијата Galaxy S24, па европските корисници веќе неволно се навикнаа на оваа практика.
Кога станува збор за спецификациите на Exynos 2600, јужнокорејски извори тврдат дека чипот носи огромни подобрувања во перформансите. Неговиот NPU (Neural Processing Unit) треба да биде дури шест пати побрз од оној во Apple A19 Pro, додека графичкиот процесор е 75 проценти побрз. Севкупно, се наведува дека Exynos 2600 е околу 30% помоќен од Snapdragon 8 Elite Gen 5.
Интересно е што Samsung ќе ги произведува и Qualcomm чиповите за Galaxy уредите, користејќи 2-нанометарска GAA технологија — истата што ја користи и Exynos 2600. Тоа значи дека, иронично, сите модели на Galaxy S26 би можеле да содржат Samsung-ови SoC чипови, без оглед на тоа кое име стои на нив.
