Иако Apple очекуваше дека тенкиот дизајн и новиот изглед на iPhone Air ќе привлечат купувачи, тоа сепак не се случи – па компанијата веќе го намалува неговото производство.
И покрај силната продажба на серијата iPhone 17, Apple наводно планира значително да го намали производството на својот најтенок модел – iPhone Air. Според информациите на Nikkei Asia, компанијата ја задржува вкупната производствена квота меѓу 85 и 90 милиони примероци за целата серија, но производството на Air го сведува речиси на ниво на „прекин на производство“.
Извори од синџирот на снабдување откриваат дека iPhone Air требало да сочинува околу 10 до 15 проценти од вкупните нарачки, но интересот на купувачите се покажал многу послаб од очекуваното. Иако рецензентите и првите корисници го пофалија новиот дизајн и малата тежина на уредот, тешко е да се игнорира слабата батерија и само една задна камера – особено ако се земе предвид почетната цена од 1.199 евра во Европа.
Слична ситуација неодамна го погоди и Samsung, кој поради слаби продажни резултати одлучи да го прекине развојот на Galaxy S26 Edge – наследникот на ултратенкиот S25 Edge, кој беше главен конкурент на iPhone Air. И двата модели, и S25 Edge и iPhone Air, покажаа дека естетиката и тенкото куќиште повеќе не се доволни за да привлечат поширока публика.
Да потсетиме, аналитичарите од Counterpoint наведуваат дека продажбата на серијата iPhone 17 во првите 10 дена на пазарот пораснала за 14 проценти во споредба со минатогодишниот iPhone 16, а најпопуларен модел е основниот, кој сега доаѓа со ProMotion екран и 256 GB внатрешна меморија во почетната верзија. iPhone Air засега ја следи судбината на iPhone 16 Plus, кој исто така беше најмалку бараниот модел во својата генерација.
