Неколку десетици пациенти кои го изгубиле видот поради прогресивна форма на слепило наречена дегенерација на макулата поврзана со стареењето (AMD), успеале да повратат дел од централниот вид благодарение на очен имплант поврзан со паметни очила.
Податоците од истражувањето се објавени во списанието The New England Journal of Medicine, а истражувачите тврдат дека пациентите со помош на оваа технологија можеле доволно јасно да гледаат за да решаваат вкрстени зборови и повторно да читаат обични книги. Меѓу учесниците имало лица постари од 60 години со дијагностициран AMD на двете очи и со оштетен вид со измерена острина на видот од најмалку 1,2 logMAR или полоша.
AMD не може да се излечи, бидејќи клетките во центарот на мрежницата со текот на времето умираат. Истражувањето се фокусирало на враќање на дел од изгубениот вид со помош на уред со димензии 2×2 милиметра, направен од микроскопски фотоволтаични соларни панели. Уредот хируршки се вградува под мрежницата во окото на пациентот, а пациентите носат паметни очила опремени со камера кои ги пренесуваат зумираните слики од околината кон имплантот на мрежницата, користејќи блиска инфрацрвена светлина. Имплантот потоа испраќа мали електрични сигнали кон оптичкиот нерв, имитирајќи ја функцијата на здравите клетки на мрежницата.
Истражувањето започнало со 38 пациенти кои го добиле имплантот, од кои 32 останале во клиничкото испитување цела година. По една година, 26 од 32 учесници гледале подобро отколку на почетокот — што претставува стапка на успех од 80 проценти. Резултатите не се совршени, бидејќи пациентите гледаат заматена, црно-бела слика од светот, но истражувачите кои не биле дел од проектот го нарекле трудот „неверојатен“.
Технологијата потекнува од компанијата за мозочно-компјутерски интерфејси Science Corporation, чиј основач и извршен директор е Макс Ходак — коосновач на Neuralink заедно со Илон Маск. Science Corporation ја презела технологијата за мрежничен имплант од француската компанија за медицински уреди Pixium Vision во 2024 година, откако таа останала без финансиски средства по речиси една деценија работа на развој на технологијата за враќање на видот, објави IEEE Spectrum. Слична судбина имала и познатата компанија за визуелни протези Second Sight Medical, чија напуштена технологија ја презел друг стартап за медицинска технологија, овозможувајќи продолжување на клиничките испитувања.
