Qualcomm го претстави својот најнов чипсет за телефони од средната класа – Snapdragon 6s Gen 4, кој носи значителни подобрувања во однос на претходниот модел, Snapdragon 6s Gen 3. Овие подобрувања не се ограничени само на зголемени перформанси на CPU и GPU, туку вклучуваат и поддршка за Full HD+ екрани со 144 Hz, mmWave и sub-6GHz 5G, како и Wi-Fi 6E конективност.
Snapdragon 6s Gen 4 е произведен со 4-нанометарскиот производствен процес на Samsung и нуди до 36% побрз CPU и 59% помоќен GPU во споредба со својот претходник. Во срцето на овој SoC се наоѓа Kryo CPU со четири јадра за високи перформанси кои работат на фреквенција до 2,4 GHz, и четири енергетски ефикасни јадра на 1,8 GHz.
GPU-то поддржува HDR гејминг, како и технологиите OpenGL ES 3.2, OpenCL 2.0 FP и Vulkan 1.1, а вклучува и карактеристики од Snapdragon Elite Gaming пакетот на Qualcomm, како што се Variable Rate Shading (VRS) и Game Quick Touch, што – според Qualcomm – дополнително ја подобрува флуидноста и одзивот во игрите.
Покрај тоа, чипсетотбподдржува до 12 GB LPDDR5X RAM со фреквенција од 3.200 MHz и UFS 3.1 меморија. Што се однесува до камерите, опремен е со Qualcomm Spectra ISP, кој поддржува сензори до 200 MP и снимање во 2K резолуција при 30 FPS.
Од другите карактеристики, тука се Snapdragon Sound, Bluetooth 5.4, како и поддршка за Quick Charge 4+ брзо полнење.
