Nvidia купува 2,9% удел во Nokia и инвестира милијарда долари во развој на 6G мрежи, означувајќи нова ера за поранешниот лидер во мобилната индустрија.
На неодамнешната NVIDIA GTC конференција, извршниот директор на компанијата Џенсен Хуанг ја изненади јавноста со најавата дека NVIDIA ќе инвестира милијарда долари во Nokia, со што ќе стекне околу 2,9% уделво финската компанија.
Овој стратешки потег има за цел заеднички развој на 6G мрежни технологии. По објавата, акциите на Нокиа скокнаа за дури 20%, достигнувајќи го највисокото ниво во последните десет години.
Nokia успешно се трансформираше без да продава телефони
Некогаш синоним за паметни телефони, Nokia го изгуби приматот во ерата на паметните уреди. Во времето кога iPhone и Android ги освојуваа пазарите, Nokia се обиде да го задржи сопствениот Symbian оперативен систем, но премногу затворената и бавна стратегија доведе до нејзин пад. Ниту партнерството со Microsoft и Windows Phone платформата не успеа да го спаси пазарниот удел.
Во последните години, телефоните на Нокиа сè уште можеа да се најдат во продажба, но под брендот HMD Global, кој имаше лиценца за користење на името. Тој договор истекува во март 2026 година, а HMD веќе почна да ги повлекува паметните телефони Нокиа од пазарот, оставајќи во понуда само основни модели.
Уште во 2014 година, тогашниот извршен директор Раџив Сури објави дека Нокиа повеќе нема да произведува телефони. Наместо тоа, компанијата се насочи кон телекомуникациски патенти и инфраструктура, користејќи го своето искуство од мобилната индустрија за развој на мрежни решенија. Денес, Нокиа опслужува бројни оператори ширум светот, вклучувајќи ги и тајванските гиганти Chunghwa Telecom и Taiwan Mobile, кои користат опрема на Нокиа за обезбедување 5G услуги.
Иако годините по повлекувањето од пазарот на мобилни телефони беа тешки, со низа финансиски загуби, од 2021 година Нокиа бележи стабилен профит и стана клучен играч во развојот на глобалната мрежна инфраструктура.
Благодарение на инвестицијата на NVIDIA и заедничката работа на 6G технологијата, Нокиа влегува во ново поглавје од својата историја — како технолошки столб на идните комуникациски системи, пишува LTN.
