YouTube воведува AI функција која автоматски ја зголемува резолуцијата и на старите видеа, претворајќи ги SD снимките во HD, па дури и во 4K содржини.
YouTube официјално најави воведување на напредна AI функција која автоматски ја подобрува резолуцијата на видеата. Оваа функција користи вештачка интелигенција за „надградба“ на постариот контент, правејќи го поостар и визуелно поквалитетен, особено за гледање на телевизори и големи екрани.
Процесот започнува со видеа со пониска резолуција, бидејќи YouTube ќе може да го подигне квалитетот од стандардна (SD) на висока (HD) резолуција, а во следната фаза и до 4K. Дополнително, системот не прави разлика меѓу стар и нов контент, па дури и видеата објавени пред повеќе години ќе добијат нов изглед. Функцијата не е ограничена само на TV верзијата, бидејќи корисниците ќе можат да ја користат и на мобилни уреди и во веб-прелистувач.
Вештачката интелигенција го подига квалитетот на YouTube видео-сликата на ново ниво
Авторите ќе можат да одлучат дали сакаат да го вклучат „AI upscaling“ квалитетот на својот канал. Од друга страна, корисниците јасно ќе ја гледаат ознаката дека видеото е „AI upscale“ верзија, а доколку го преферираат оригиналниот изглед, лесно ќе можат да се вратат на изворната резолуција.
Screenshot
Странските медиуми веќе го оценуваат ова како најзначајното визуелно унапредување на YouTube во последните неколку години. Сепак, технологијата сè уште не е совршена, бидејќи понекогаш AI погрешно ги толкува буквите или линиите на екранот, создавајќи искривени форми и визуелни грешки. Google сега има задача да ги исправи овие проблеми пред поширока имплементација.
Покрај AI унапредувањата на сликата, YouTube претстави и низа додатоци за TV верзијата: максималната големина на thumbnail-сликите за видеата е зголемена од 2 MB на 50 MB, почетната страница доби поатрактивен изглед кој повеќе привлекува внимание, а пребарувањето е подобрено така што најпрво ги прикажува резултатите од каналот од кој е започнато пребарувањето.
Посебно беше истакната и опцијата за интерактивно купување – корисниците ќе можат да скенираат QR-код за време на гледање на означените видеа и веднаш да ја отворат страницата на производот на својот телефон, објавува официјалниот блог на YouTube.
