Canva го изненади светот на креативниот софтвер – Affinity Photo, Designer и Publisher сега се обединети во една целосно бесплатна апликација која нуди сè: од обработка на фотографии до дизајн и издаваштво.
Во момент кога многумина стравуваа дека Canva, по купувањето на компанијата Serif, ќе воведе претплата за Affinity апликациите, пристигна целосно спротивно изненадување. Наместо да воведе ограничувања, Canva трите популарни Affinity апликации: Photo, Designer и Publisher, ги спои во една единствена програма која од сега е целосно бесплатна за сите корисници.
Affinity – три алатки во едно
Новата апликација, едноставно наречена Affinity, ги комбинира главните функции на трите порано одделни платформи: алатка за обработка на фотографии, векторски дизајн и издаваштво. Тоа значи дека корисниците сега можат да уредуваат фотографии, да создаваат илустрации и да дизајнираат цели публикации, сè во една средина. Програмата веќе е достапна за Windows и Mac, а верзијата за iPad допрва се очекува.
Уште подобро, сите функции се бесплатни. Потребно е само да се креира бесплатен Canva профил, без задолжителна Pro претплата, и сите алатки веднаш стануваат достапни. Нема скриени функции зад „premium“ ѕид, што е вистинска реткост во денешната екосфера на креативни алатки.
Иако интерфејсот е редизајниран, корисниците на Affinity ќе се чувствуваат „како дома“. Тука се добро познатите алатки како селекции, слоеви, маски, „clone stamp“ и сите опции за корекција на боја и ретуширање. Програмата поддржува важни формати како PSD, AI, PDF, SVG, TIFF и IDML, како и новиот обединет .af формат.
Affinity нуди и GPU акцелерација, што овозможува мазно зумирање и обработка на големи фајлови во реално време, додека напредните алатки за типографија и „Smart Master Pages“ го олеснуваат дизајнот на сложени публикации.
Една од главните новини е можноста за целосно прилагодување на работната средина преку опцијата Custom Studios. Корисниците можат да комбинираат алатки од векторскиот, пиксел и layout студио, да ги распоредуваат панелите по желба и да зачуваат повеќе конфигурации за различни проекти. Уште поинтересно – овие поставки може да се споделуваат и преземаат, со што Affinity создава заедница која разменува workflow решенија и инспирација.
Canva AI Studio – мостот помеѓу Affinity и Canva
Иако Affinity сега е бесплатен, корисниците на Canva со Pro претплата добиваат дополнителни предности, пред сè пристап до AI Studio алатките директно во Affinity. Тука се функции како Generative Fill, Remove Background и Expand & Edit, кои донесуваат дел од напредните Adobe AI можности без потреба од дополнителен софтвер.
Тоа значи дека корисниците кои сакаат да избегнат генеративна АИ можат да работат целосно бесплатно, додека оние што сакаат да експериментираат со напредни опции можат да го сторат тоа со Canva Pro претплата.
Нов стандард во креативниот софтвер
Со овој потег Canva успеа да ги надмине очекувањата на пазарот – наместо затворање на екосистемот или воведување претплата, понуди моќна, професионална и достапна алатка за сите.
Affinity сега станува сериозен конкурент на Adobe и неговите апликации, а многу корисници кои со години барале квалитетно бесплатно решение конечно го добија. Ако целта на Canva била да ги освои срцата (и проектите) на креативците ширум светот – изгледа дека токму успеа во тоа, пренесува Creative Blog.
