Директорот на Microsoft AI, Мустафа Сулајман изјави дека свеста може да постои само кај биолошките суштества и дека обидите за создавање „свесна вештачка интелигенција“ претставуваат погрешна насока во развојот на технологијата.
Директорот на одделот за вештачка интелигенција во Microsoft, Мустафа Сулајман, предизвика нова дебата во технолошкиот свет со изјава дека свеста може да постои исклучиво кај биолошките суштества. Во интервју за CNBC, Сулајман рече дека смета дека е погрешно да се стремиме кон создавање „свесна вештачка интелигенција“ и ги повика истражувачите да не тргнуваат по тој пат.
„Тоа едноставно не е работа со која луѓето треба да се занимаваат“, рече Сулајман за време на AfroTech конференцијата во Хјустон. „Ако поставите погрешно прашање, ќе добиете погрешен одговор, а прашањето за свесна вештачка интелигенција е токму тоа: погрешно прашање.“
Сулајман, кој важи за еден од највлијателните гласови во индустријата на AI технологиите, истакна дека системите како ChatGPT или други напредни модели не можат да поседуваат емоции, страдање или свест – туку само симулација на тие појави. „AI не чувствува болка. Може да создаде наратив за искуство и свест, но тоа не е вистинско искуство“, објасни Сулајман.
Неговиот став се заснова на филозофската теорија на биолошки натурализам, формулирана од Џон Серл, која тврди дека свеста е неразделива од физиолошките процеси во живиот мозок. „Причината зошто им даваме права на луѓето е тоа што тие можат да страдаат, што имаат мрежа на болка и самосвест. Моделите на вештачка интелигенција тоа го немаат. Тие само симулираат“, додаде Сулајман.
Овие изјави доаѓаат во момент кога пазарот на „AI придружници“, дигитални партнери што имитираат емоционални односи, доживува експанзија, со понуди од компании како Meta и xAI на Илон Маск. Паралелно со тоа, OpenAI и неговиот директор Сем Алтман продолжуваат со развој кон т.н. вештачка општа интелигенција (AGI), што дополнително го отвора прашањето за границите меѓу машинската и човечката свест.
Сулајман, кој пред да дојде во Microsoft во 2024 година беше ко-основач на DeepMind и основач на стартапот Inflection AI, стана еден од главните застапници на етички пристап во развојот на AI системите. Тој неодамна објасни дека Microsoft нема да развива chatbot-и наменети за еротска содржина, за разлика од конкурентите кои го гледаат тој сегмент како нов извор на приходи. „Постојат области во кои едноставно не сакаме да навлегуваме“, рече тој.
Покрај тоа, Сулајман се залага за AI услуги кои се „свесни дека се AI“ и кои секогаш делуваат во служба на човекот. Новите Copilot додатоци, како функцијата real talk, се замислени да ги предизвикуваат ставовите на корисникот и да избегнуваат ласкање. „AI може да биде духовит, дури и малку дрзок, но секогаш во рамки на човечките вредности“, истакна тој.
На крајот, Сулајман предупреди дека здрава доза страв од AI технологијата е неопходна. „Ако AI не те плаши барем малку, веројатно не ја разбираш. Стравот и скептицизмот се неопходни. Не ни треба слепа трка по напредок“, пренесува CNBC.
Неговите зборови ја истакнуваат линијата на разделба меѓу технолошкиот напредок и етичката одговорност и го отвораат прашањето што станува клучно за иднината на човештвото: дали сакаме интелигенција што навистина нè разбира или онаа што само нè имитира?
