Апликацијата Google Maps е унапредена со интеграција на вештачката интелигенција Gemini. AI асистентот на Google ќе ја напојува функцијата што компанијата ја нарекува „првото hands-free искуство на возење со разговор“.
Според Google, возачот ќе се чувствува како да „има пријател со знаење на совозачкото седиште, кој сигурно може да му помогне да стигне таму каде што оди“.
Сепак, AI chatbot-ите никогаш не немале недостаток на самодоверба — проблемот е колку навистина е сигурно она што го кажуваат. Во секој случај, корисникот ќе може да го праша Gemini што било додека ја користи апликацијата Google Maps за навигација.
Дури и сложени барања во повеќе чекори треба да функционираат добро. Gemini исто така може да извршува и други задачи, како додавање настани во календарот (Google Calendar), а можно е и пријавување сообраќајни застои преку глас. Оваа функција ќе биде достапна „во наредните неколку недели“ на Android и iOS.
Интересно е што и самите навигациски инструкции добиваат надградба базирана на Gemini и ќе користат ориентациони точки за водење на корисниците — на пример, „сврти десно по ресторанот Thai Siam“. Овие објекти ќе бидат истакнати на мапата кога корисникот ќе им се приближува. Функцијата веќе започнува да се применува на Android и iOS во САД.
Дури и ако возачот не користи навигација, Google Maps ќе го известува однапред за сообраќајни застои, проактивно предупредувајќи го за проблеми на патот пред него. Овие известувања се воведуваат во САД на Android.
На крај, можно е да се допре иконата со камера во полето за пребарување во Google Maps и телефонот да се насочи исправено за идентификација на различни места, ресторани, кафулиња, продавници или познати знаменитости во околината. Кога корисникот ќе ги види ознаките, може да го допре микрофонот и да постави прашања за секое место — „како што би ги поставил на пријател“.
Корисникот ќе ги добие потребните одговори благодарение на „моќната комбинација на можностите на Gemini и знаењето на Google Maps за местата низ целиот свет“, соопшти компанијата. Оваа нова Lens функција ќе се воведува „постепено“ подоцна овој месец во САД, на Android и iOS.
