Microsoft ја завршува општата поддршка за Windows 10 – дознајте како бесплатно да ги активирате проширените безбедносни ажурирања (ESU) и да го заштитите вашиот компјутер од нови закани пред истекот на рокот
По турбулентниот период што го одбележаа прекинот на општата поддршка за системот Windows 10 и неколкуте итни ажурирања за Windows 11, Microsoft сега става конечна точка на поддршката за својот најпопуларен оперативен систем. Според анализата објавена во списанието Forbes, иако официјалниот крај на поддршката беше на 14 октомври, вистинскиот ризик за корисниците започнува токму оваа недела.
Сите корисници на Windows 10 ги добија последните општи безбедносни закрпи во октомври, кои им обезбедија привремена заштита. Сепак, таа заштита истекува со доаѓањето на следниот „Patch Tuesday“ циклус на ажурирања — редовниот месечен термин кога Microsoft ги објавува безбедносните исправки. По тој датум, безбедносните ажурирања ќе бидат достапни само за корисниците кои ќе се пријават во програмата за бесплатни проширени безбедносни ажурирања (ESU). Податоците се загрижувачки – се проценува дека околу 40% од сите Windows корисници, односно неверојатни 560 милиони луѓе, сè уште користат Windows 10.
Компанијата предупредува дека „уредите ќе бидат значително поранливи на вируси и малициозен софтвер“ во периодот пред пријавувањето. Со оглед на историјата на безбедносни пропусти, одложувањето на оваа одлука претставува сериозен ризик. За среќа, Microsoft овозможи пријавување во ESU програмата во било кој момент до конечниот рок – 13 октомври 2026 година. Откако ќе се регистрирате, ќе ги добивате сите кумулативни ажурирања за целосна заштита на вашиот компјутер.
ESU програмата е бесплатна за корисниците, а условите за бесплатна регистрација вклучуваат лиценцирана верзија на Windows 10, редовна најава на Microsoft профилот и синхронизација на поставките со услугата OneDrive. За оние што не сакаат да поминат низ овие чекори, можно е да се купи ESU лиценца по цена од 30 долари (плус данок).
Се разбира, ако вашиот компјутер ги исполнува хардверските барања, најдобра и најбезбедна опција останува надградбата на Windows 11. Овој систем нуди посовремена заштита во однос на ESU програмата, која треба да се смета за привремено решение за одржување, а не за целосно продолжување на животниот век на системот.
Без разлика која опција ќе ја изберете, препораката е да не влегувате во следната недела без најмалку активиран ESU програм. Ако користите деловен компјутер, достапни се и други, поскапи, но подолгорочни опции за поддршка.
