Прелиминарните информации укажуваат дека Apple нема да направи значаен редизајн на серијата часовници Apple Watch пред 2028 година, и покрај претходните очекувања.
Најновите информации објавени на кинеската социјална мрежа Weibo сугерираат дека следната генерација на Apple Watch, планирана за 2026 година, нема да донесе никакви поголеми промени во дизајнот. Според наводите на познатиот извор Instant Digital, Apple наводно нема да претстави целосно нов дизајн до 2028 година, односно една година по излегувањето на јубиларниот, 20-годишен модел на iPhone.
Ова го намалува претходниот ентузијазам и шпекулации дека Apple подготвува голема дизајнерска промена за следната година. Уште во август, DigiTimes објави дека барем еден модел од 2026 година ќе добие „значајни“ измени на надворешниот изглед поврзани со нови сензори.
Редизајнот на Apple Watch е одложен за 2028 година
Ова ги покрена шпекулациите дека Apple би можел да ја интегрира својата технологија за неинвазивно мерење на глукоза во крвта, но таквата функција сè уште е години далеку од финализација.
Марк Гурман од Bloomberg претходно известуваше за можноста за потенко куќиште и магнетен систем за ремчиња. Иако Apple Watch Series 10 донесе потенко куќиште, магнетниот систем никогаш не се појави, а ни серијата 11 не донесе дополнителни визуелни промени.
Објавениот софтверски код на Apple сугерира дека компанијата тестира можност за воведување Touch ID автентикација во Apple Watch моделите од 2026 година. Сепак, многу е можно решението да биде сместено под екранот, без влијание врз изгледот на самиот часовник.
Сè на сè, љубителите на линијата Apple Watch ќе треба да почекаат уште неколку години пред да видат голем естетски исчекор во дизајнот, пренесува MacRumors.
