Android 17 би можел да ја воведе системската верзија на функцијата Universal Clipboard, овозможувајќи copy/paste на содржини помеѓу Android уреди без потреба од дополнителни апликации.
Според наводите, Google работи на долгоочекувана системска функција која ќе овозможи лесно копирање и пренос на содржини помеѓу различни Android уреди, слично на решението што Apple го нуди со години преку Universal Clipboard. Раните информации укажуваат дека Android 17 би можел да ја елиминира потребата од инсталирање дополнителни апликации за синхронизација на содржината меѓу Android телефони.
Во моментов, копираниот текст може да се пренесува помеѓу Pixel телефони и Windows компјутери само ако SwiftKey е поставена како основна тастатура, додека некои производители имаат сопствени системски алати што ги заобиколуваат ограничувањата за работа во позадина и ги испраќаат податоците директно до апликацијата Microsoft Phone Link.
Universal Clipboard пристигнува како системска функција на Android 17
Според најновите информации, Google планира сопствена имплементација за Android 17 преку Google Play Services, со цел да овозможи синхронизација помеѓу Android телефони и Chromebook уреди. Функцијата интерно се води под истото име како и кај Apple системот, иако не е сигурно дека тоа ќе биде конечниот назив.
Во најновите beta и canary верзии на Android се појавила нова UniversalClipboardManager класа во рамките на секцијата android.companion.datatransfer.continuity, што е идентично место каде што се наоѓа и имплементацијата на Handoff која Google исто така ја развива. Се очекува Google Play Services да не го чита clipboard-от директно, туку таа задача да ја извршува Pixel System Service апликацијата користејќи ја дозволата READ_CLIPBOARD_IN_BACKGROUND за проверка на типот на податоци.
Кога системот ќе препознае текст, испраќа известување до модулот Google Play Services, кој потоа ги пренесува податоците до поврзаните уреди преку Handoff функционалноста. Меѓутоа, засега нема наznаки дека функцијата ќе поддржува фотографии, видеа или документи, што претставува чекор назад во однос на решението на Apple.
Функцијата првпат се појавила во Play Services модулот во ноември минатата година, што укажува дека Google работи на неа веќе подолго време, но не се очекува да биде достапна пред официјалното доаѓање на Android 17, пишува Live Mint.
